كدا همه جابوا أخرهم، كدا معدش فيها سكوت، كدا باظت، كدا لازم المصريين يقفوا وقفة رجالة ويبقوا إيد واحدة، بهذه الجمل والكلمات راحت كنباوية تحدث نفسها حين سمعها كنباوى فذهب إليها على الفور. كنباوي: إيه يا كنباوية إحنا رجعنا لحكاية إنك تكلمى نفسك من تاني؟ كنباوية: هو بعد اللى حصل إمبارح ينفع الواحد ما يكلمش نفسه؟ كنباوي: أنتى قصدك جمعة تطهير القضاء؟ كنباوية: ما تقولش زيهم يا كنباوى علشان ما أزعلش منك قول جمعة أخونة القضاء كنباوي: حاضر يا كنباوية ماتزعليش نفسك جمعة أخونة القضاء ارتحتى كده؟ كنباوية: أيوه ارتحت كنباوي: أنتى إيه اللى مضايقك جمعة وعدت كنباوي: لا يا كنباوى دى مش أى جمعة ومش حتعدى على خير وما ينفعش تعدى مرور الكرام دى لازم يتأخد لها موقف علشان ما تتكررش تانى ده استهبال وقلة أدب وتطاول من أمتى كان أى نظام بيجى يشكك فى نزاهة القضاء المصرى اللى بينضرب بيه المثل بين الدول. كنباوية: بصراحة يا كنباوية الحكاية زادت عن حدها أوى والإخوان لازم يكون ليهم رادع ويكون فيه حد يقدر يلمهم ويحاسبهم على سفالتهم وتطاولهم على القضاء بكرة يتطاولوا على وزارة الدفاع كنباوية: دول لا عاشوا ولا كانوا يوم ما يتطاولوا على وزارة الدفاع هى إيه بقت سايبة؟ كنباوي: أيوه بقت سايبة طول ما إحنا ساكتين لهم والجيش ساكت ومرسى عاجبه أن أنصاره بيدافعوا عنه وبينزلوا فى مليونيات ومظاهرات. كنباوية: والداخلية رافعة الإريال ومباركة تطاول الإخوان هى كمان كنباوي: ماهى الداخلية باعت نفسها لمرسى ومكتب الإرشاد من زمان حتنتظرى منها إيه يعوض علينا ربنا فى الداخلية. كنباوية: عندك حق بس القضاة ردوا وقالوا للإخوان قبل ما تقولوا طهروا القضاء روحوا طهروا نفسكم أنتم الأول. كنباوي: القضاه قالوا كده؟ ده يبقوا والله جدعان كنباوية: بقت واضحة يا كنباوى وضوح الشمس للغبى مرسى بيأخون الدولة ومصر كلها. كنباوي: وبعدين يا كنباوية حنسكت على كده؟ كنباوية: لا ماينفعش نسكت كده حيركبونا ويدلدلوا رجليهم لازم يقفوا عند حدهم لازم. كنباوي: فين المعارضة؟ فين جبهة الإنقاذ؟ فين الشارع؟ فين المصريين؟ فين حمدين صباحى والبرادعي؟ كنباوية: موجودين وأكيد بكره الدنيا حتقوم على الإخوان يا كنباوى دى بداية حرب أهلية ومرسى حاطط إيده فى المية الساقعة وتلاقيه فرحان وقاعد يتفرج ولا همه حاجه هو خسران إيه؟ كنباوي: ده رئيس ده؟ اللى يشوف أهله بيتناحروا وبيقتلوا بعض ويقف يتفرج. كنباوية: ده مش بعيد يكون بيشجع الإخوان على ضرب المتظاهرين والنزول فى الشوارع والميادين. كنباوي: شكل كلامك صح هو ليه مصلحة فى نزول الإخوان وبمباركته كمان. كنباوية: المفروض أى رئيس عاقل حكيم يطلع بعد أحداث إمبارح يقول خطاب يهدى فيه الناس على الأقل. كنباوي: خطاب مين يا كنباوية هى ناقصة تهته؟ كنباوية: على قولك هو بيعرف يقول كلمتين على بعض ده حتى باين اللى بيكتب له الخطابات عبيط وخريج محو أمية. لا بيعرف السما من العما إحنا مش ناقصين عته. كنباوي: على قولك أنتى كمان لا عايزين منه خطاب ولا حتى اعتذار إحنا عاوزينه يرحل ويسيبنا فى حالنا. كنباوية: مش باين ياكنباوى مش باين. كنباوي: لأ يا كنباويه لازم يبان مش حنفضل نتفرج على مصر وهى بتضيع على إيد شويه مهرجين مش فاهمين حاجة. كنباوية: مصر كلها لازم تطلع تطالب بإسقاط النظام لازم الثورة تكتمل لازم لازم. كنباوي: مفيش قدامنا غير كده هو اللى دفعنا لكده وأمرنا لله. كنباوية: يلا يا كنباوى نقوم ناكل لقمة أنا جعانة. كنباوي: ومين سمعك أنا كمان جعان. كنباوية: حأكلك وأروقك أحلى روقان ولا عاش ولا كان الإخوان اللى يعكروا دمنا.. كالهم قطر سكة حديد أعور وريحنا منهم ومن قرفهم كنباوي: أمين يارب أمين
