"كنباوية" تزغرد وهى تقول: كده بقى فيه أمل ..تسلم ياسيسى .. يسمعها كنباوى فيندهش ويسرع إليها ليعلم سر الزغرودة. كنباوى: إيه يا "كنباوية" جوز بنتك لقى شقة بالقرشين اللى معاه علشان كده بتزغرطى ما تفرحينا معاكى. "كنباوية": جوز بنتى إيه ونيلة إيه هو ده حيلاقى شقة أبدا، ده موكوس والبت اتوكست معاه. كنباوى: ياشيخة حرام عليكى ده الجدع شغال شغلانتين علشان يلم قرشين ينفعوه فى إنه يلاقى شقة إنتى اللى قرشة ملحته وحطاه على دماغك وزاعقة، والواد مؤدب وغلبان وبيحب البت شلتة وشاريها ياولية ده اللى حيصونها ويسعدها بطلى ظلم وحسنى أسلوبك معاه ومش كل ما تشوفيه تقطميه وتسمى بدنه. "كنباوية": أنت بتدافع عنه علشان راجل زيك يلا زى بعضه أعامله كويس علشان خاطرك. كنباوى: إيه اللى خلاكى تزغرطى؟ "كنباوية": السيسى طلع راجل جدع مرسى راح اجتمع معاه وبلغه إنه ناوى يشد المعارضة ويتخذ إجراءات ضدهم لأنه زهق منهم. كنباوى: وبعدين السيسى قال إيه قدام الكلام ده؟ "كنباوية": السيسى طلع واعى وقاله إنه كده حيولعها نار والعملية مش حتهدى وإنه ضد الكلام ده وإنه ممكن يوصل لحرب أهلية وإن الجيش مش حيوافق على الوضع ده، ومش حيقبل إن مصر تكون فيها حرب أهلية، وإنه حيتدخل فى الوقت المناسب، وإن سكوت الجيش محسوب وهو بيراقب الأوضاع من بعيد. كنباوى: ومرسى كان موقفه إيه؟ "كنباوية": مرسى انضرب على قلبه وضرب بوز وكان الود وده يخنق السيسى بس مسك نفسه لأنه شايف إن السيسى هو العقبة الوحيدة فى طريق خطة التمكين اللى الإخوان بيسعوا إليها، ومشى من الاجتماع وهو قرفان وراح بلغ الشاطر وبديع باللى حصل وقاعدين دلوقتى بيخططوا للسيسى والجيش. كنباوى: والسيسى والجيش حيسكتوا؟ "كنباوية": لأ طبعا مش حيسكتوا حيستنوا لحد ما الدنيا تهدى يا إما حيتدخلوا علشان الموقف ما يتأزمش أصل بينى وبينك مرسى زودها أوى عايز يبلع البلد فى كرشه ويقطع لسان المعارضة، مش عاوز حد يعارضه أبدا. كنباوى: هو فيه بلد من غير معارضة؟ هو فاكر نفسه مين عمر بن الخطاب؟ "كنباوية": الإخوان فاكرينه كده. كنباوى: دول مش واعيين والسكينة سرقاهم. "كنباوية": بكرة السكينة دى تدبحهم ويبقى هم اللى جابوه لنفسهم. كنباوى: اللى بيشيل قربة مخرومة بتخر على راسه. "كنباوية": عندك حق بكرة تتهد على دماغهم. كنباوى: بس السيسى طلع مية مية رجولة بصحيح وماخافش من مرسى واللى وراه. "كنباوية": ده القوالب نامت والانصاص قامت، ده كمان محمد عباس رئيس حزب الراية اللى أسسه أبو إسماعيل بيهدد هو كمان المعارضة والإعلاميين إنه حيصفيهم بالهاون والجرينوف ومحدش حيقدر يمسك عليهم حاجة. كنباوى: دى بلطجة وقلة ذوق وتهديد صريح وفين الحكومة؟ "كنباوية": حكومة شاالله ياحكومة ما الحكومة بقت فى جيب الإخوان. كنباوى: أخبار الأكل إيه؟ "كنباوية": الأكل جاهز على الطبلية عملالك بط ورقاق باللحمة المفرومة وبامية باللحمة الضانى. كنباوى: إيه الرضا ده هو النهارده العيد؟ "كنباوية": لأ ياعنيا النهارده الخميس يعنى عيد برضه يا كنباوى. كنباوى: قولتيلى أنت ناويهالى؟ "كنباوية": نويهالك ومش حتنازل عن حقى أبدا. كنباوى: ماشى يا"كنباوية" اللى أنتى عيزاه حيكون. "كنباوية": ومالك بتقولها كده من غير نفس. كنباوى: ماتظلمينيش أنا بس عندى شد عضلى. "كنباوية": شد عضلى ماشدش مش حسيبك. كنباوى: حاضر يا"كنباوية" أمرك. "كنباوية": يحضرلك الخير ياخويا يلا علشان نتغده. كنباوى: يلا والأمر لله.