كنباوى: تجلس فى الفسحة تفترش الأرض وتقوم بتحضير المحشى كرمب لزوجها كنباوى وأولادها. كنباوية: أنا مش عارفة وحمة إية دى لازم كنباوى يأكل محشى كرمب النهاردة ما كنا أكلنا أى حاجة ده غلبة وبياخد وقت. كنباوى: بتقولى إيه يا كنباوية؟ بتبرطمى ليه؟ علشان حلة محشى نفسى فيها، يا ولية اتعبى شوية، بدل ما أنت قاعدة ع النت على طول أنا مش عارف مين علمك تدخلى ع النت. كنباوية: البت أحلام بنت جارتنا سعاد كتر خيرها هى اللى علمتنى اهه الواحدة لازم تنور نفسها وتساير العصر، كل وقت وله أدانه يا كنباوى. كنباوى: الله يرحم أبوكى اللى كان بيتفرج على صندوق الدنيا والأراجوز كنباوية: سيب أبويا فى حاله يا كنباوى وقولى جبت فلوس قماش التنجيد بتاع بنتك؟ كنباوى: لسه يا كنباوية اهه بحاول استلف قرشين يساعدونى فى جهازها أنا مش عارف الدنيا ملطشة معايه كده ليه؟ كان لازم البت تتجوز اليومين دول ما كنا أجلناها شوية لحد الحال ما يتعدل . كنباوية: حتقعدها جنبك لحد امته يا كنباوى البت بقى عندها 29 سنة؟ كفاية الناس كلت وشى على قعدتها، وخطيبها هو كمان زهق كل سنة نأجل؟ نأجل أحسن يسيبها يا خويا وتقعد لنا زى البيت الوقف احنا ما صدقنا لقينا عريس يرضى بظروفنا المهببة. كنباوى: على قولك الجواز ستره برضه، ربنا يقدرنى على باقى جهازها قوليلى إيه آخر الأخبار عندك يا بتاعة النت. كنباوية: "ضاحكة" آخر الأخبار حمدين يا خويا حيمثل فيلم مع غادة عبد الرازق وحيخرجه خالد يوسف شكله هيطلع فيلم جامد . كنباوى: مش حمدين ده اللى كان مرشح نفسه لرئاسة الجمهورية؟ كنباوى: إيوه يا خويا هو بتاع جبهة الإنقاذ الوطنى والتيار الشعبى . كنباوى: طيب ماله هو ومال التمثيل؟ هو عايز يبقى رئيس جمهورية ولا ممثل . كنباوية: ما الاثنين واحد يا خويا كله تمثيل فى تمثيل، أنت ما شوفتوش مرسى أول ما طلع فى التحرير وفتح الجاكت بتاع البدلة، وقال أنا أدامكم اهه يا أهلى وعشيرتى، وأنا رئيس لكل المصريين ده كله وحياتك كان تمثيل فى تمثيل واديك شايف اهه إيه اللى حصل بعد كده، بقى رئيس للإخوان المسلمين وبس، مش فارقة بقى يا كنباوى رئيس جمهورية من ممثل الاثنين واحد . كنباوى: على قولك كله بيمثل على كله، وكله فى الآخر بيعمل لمصلحته واحنا اللى لايصين بينهم، جاتهم القرف كلهم. كنباوية: بس أنا قلبى حاسس كده أن حمدين ده هيبقى رئيس مصر اللى جاى. كنباوى: وجالك منين يا ام العريف الاحساس ده؟ بتخمنى حضرتك. كنباوية: بص يا اخويا التاريخ بيعيد نفسه . كنباوى: " مندهشا" ما شاء الله وعرفتى تتكلمى كمان يا كنباوية زى المذيعات اللى بيطلعوا فى التليفزيون، التاريخ بيعيد نفسه ده احنا كده اتطورنا خالص، كنا فى جره وطلعنا لبره ده انا بكره كده مش هعرف اتكلم معاك . كنباوية : فشر يا اخويا انا مهما اتنورت حفضل خدامة تحت رجليك، ده انت جوزى، وسبعى وابو عيالى. كنباوى : اصيلة يا كنباوية من بيت اصول كنباوية : هى الواحده مننا مهما عليت واتنورت ليها مين غير جوزها ؟ فرشها وغطاها والله يا كنباوى انت ما تتاقل عندى بالدهب كنباوى : ايه يا كنباوية ايه طقم الحنيه ده والمشاعر ده انتى فى نيتك حاجه، النهارده مش الخميس باكنباويه. كنباوية : " ضاحكة " ما تكسفنيش بقى يا كنباوى ده اللى جوايا يا خويا بس ما يمنعش برضه إن نيتى فى حاجة كنباوى : طيب يا كنباوية شكرا على اللى جواكى، وبالنسبة اللى فى نيتك خليه فى نيتك ليوم الخميس كنباوية : حاضر يا خويا اللى تشوفه المهم اكمل لك أصل السادات مثل كام دور كده وهو صغير فى السيما، بعدها بقى رئيس، وريجان بتاع أمريكا هو كمان قبل ما يبقى رئيس كان ممثل، وحمدين مثل مع حنان ترك مشهدين فى فيلم الآخر بتاع يوسف شاهين ده كله من وجهة نظرى . كنباوى : بقالك كمان وجهة نظر صلاة النبى أحسن . كنباوية : يا كنباوى ما تتريأش عليا وسبنى أكمل كلامى . كنباوى : كملى يا مدام كنباوى كملى . كنباوية : ده فال خير، وطالما اللى سبقوه ومثلوا بقوا رؤساء هو كمان حيجى عليه الدور ويبقى رئيس . كنباوى : لاء وجهة نظر وجيهة برضه بس أنا بعد ما مرسى ظهر على حقيقته لا بقى عندى ثقة لافيه ولا فى غيره، وما بقتش تفرق معايا مرسى أو حمدين أو حتى عبد الصمد كنباوية : مين عبد الصمد ده يا خويا؟ كنباوى : ده الراجل اللى بشترى من عنده الطعمية، الرك ع النية يا كنباوية، الرك ع النية حسيبك أنا وأنزل على أكل عيشى سيبك من النت وكملى المحشى عاوز ارجع بالليل اتعشى بيه كنباوية : حاضر يا سبعى بالليل يكون جاهز، وتحت امرك ومطرح ما يسرى يمرى، وبالهنا والشفا كنباوى : هناكى الله يا كنباوية سلام كنباوية : سلام يا كنباوى يرجعك ربنا سالم غانم مجبور الخاطر.
