إيه ده .. الله...خلعتوا مبارك...برافوا عليكم يا ولاد .. إنتو شباب زى الفل .. مستقبل مصر .. والله براوه .. هنعملكم مكتب لزق فى مكتب رئيس الوزرا.. و نخليكوا تعملوا أحزاب .. و هنطلعكم فى التلفزيون كل يوم .. بس بصوا بقى .. السياسه و الحكم مش لعبه.. إحنا نحكم و إنتو روحوا إنتجوا و روقوا الدنيا .. و إبدئوا بالرصيف .. روحوا يا ولاد إدهنوا الرصيف .. إيه ؟ جهاز الشرطه فاسد و مش عايز يأمن الشوارع؟؟ معلش يا جماعه .. الضربه كانت موجعه .. دول بشر زينا .. أصبروا شويه و هيرجعوا يظبطوكم واحد واحد.. و إيه موضوع التطهير ده؟؟ ده فيهم كفاءات و خبره .. هو يعنى علشان فيه لواء قال إحنا أسيادهم.. ذلة لسان .. و أدينا نقلناه .. كفايه بأه .. ما تشغلوش روحكم بالموضوع إنتوا بس .. و روحوا إدهنوا الرصيف.. و بعدين يعنى إيه شوية عيال تنسحب من لسانها و تشتم.. ده الواحد علشان يعمل ثوره لازم يبقى مؤدب.. و كمان لمّين بعضيهم و رايحين يقفولى قدام الوزاره.. كويس إن سيادة اللواء لم الحى كله و قالهم إن العيال دى عملا.. و ما شاء الله عليهم موتوا منهم إتنين.. يالا فى دهيه.. و لايهمكم.. أصل دول مش من شباب الثوره زيكم.. إنتو الشباب الفاهم المنتج.. اللى بيروح يدهن الرصيف.. و بعدين سجناء إيه اللى عندنا دول؟؟ يا جماعه دى عيال بتتكلم فى مواضيع عيب حد يتكلم فيها.. و ما ينفعش معاهم غير حكم سريع و بدون إستئناف.. علشان يبقوا عبره و الناس تخلص من الفتنه اللى هيعملوها.. إيه؟ الرئيس السابق؟؟ لا ياخويا...ماثبتش حاجه..القانون لازم ياخد مجراه.. أه هو يمكن إحنا كنا لمحنا إننا خدنا أوامر بضرب الثوره.. بس ده كان مجرد تلميح يا جماعه..مش دليل.. سيبكم بس من الحاجات دى و سيبوها للقضاء بتاعنا اللى زى الفل.. و توكلوا على الله إنتم.. و روحوا إدهنوا الرصيف.. و بعدين موضوع السفاره ده مش وقته يا جماعه.. ما حنا ياما ماتلنا عساكر على الحدود..هتتحمقوا أكتر مننا يعنى؟؟ و لعلمكم بقى إحنا اللى سبنا الواد ده يطلع و يشيل العلم.. فرحتوا بقى يا خويا؟؟ إستفدتم إيه؟؟ عارفين الواد ده كان ممكن ما يضيعش وقته فى الكلام ده .. و يروح معاكم يا شباب.. و يدهن الرصيف.. .. و الصينيه لازم نفضل نحميها بروحنا..ما حدش هيعتبها.. و لا عايزين الإعتصامات و الخيام ترجع ؟؟ و إنتم عارفين بقى الخيام و الفجور اللى بيحصل فيها.. ده أكيد غضب ربنا من اللى بيحصل فى الخيام هو اللى موقف الإنتاج لحد دلوقتى.. أستغفر الله العظيم.. ركزوا شويه يا ولاد.. فى حته هناك ما دهنتش من الرصيف.. و أحب أؤكد إننا مع الثوره من أول يوم..بل و كنا من المخططين ليها و إنتو ما تعرفوش.. موقعة الجمل؟؟ لأ دى كان واضح إن الثوار هيكسبوا..ما كانش فيه داعى للتدخل.. و بعدين بقى ..بلاش كلام فى اللى فات.. .خلينا إيد واحده..مش إنتو اللى قلتوا كده؟؟ و الإنتخابات جايه بإذن الله و ما فيش فلول و لا تزوير و لاحاجه.. سيبونا بس نظبط القوانين و نأيفها..و إحنا عندنا ناس خبره كفايه.. مش عايزين حد ييجى يفتى..ما هياش كيميا.. بس إحنا يمكن نتأخر شويه.. و إنتوا ممكن تستغلوا الوقت ... و تروحوا تدهنوا الرصيف.. إيه؟ نازلين تانى التحرير؟؟ ليه ؟ ما إقتنعتوش بكلامى؟؟ طيب.. أنا هسألكم سؤال واحد يصحى ضميركم..و يرجعكم عن قراركم المتهور ده.. لما إنتوا كلكم هتروحوا.. مين اللى هيدهن الرصيف؟؟؟؟