طبعا أنا عارف كل اللى نفسكم تقولوه.. وعارف مدى الحسرة اللى حضراتكم فيها.. وعلشان كدا أنا جمعتكم النهاردة يا أهل دائرتى الكرام.. علشان تعرفوا إنى بحس بيكم دون أن تتكلموا أو تطلبوا لقائى. عارف أن موضوع بيع المستشفيات الحكومية والجامعية شاغل بالكم وراعبكم.. وعارف أن النواب اللى حضراتكم اختارتوهم ليس لهم دور حتى الآن في وقف هذه المهزلة. وعارف إنكم ندمانين أنى أنا مش تحت قبة البرلمان.. وتشعرون بخطئكم في عدم التصويت لصالحى لأننى أنا الوحيد الذي لو كان داخل البرلمان ما كان أحد ليستطيع مجرد طرح فكرة بيع المستشفيات هذه. يعنى إحنا مش عارفين نتعالج فيها وهى تابعة للحكومة والجامعات _يعنى مش بتاعة حد_ يبقى إزاى هنعرف نتعالج في أمها وهى تابعة لرجال أعمال وكمان شركات أجنبية؟! طب حد يدينى عقله ويقولى فين سيادة النواب من الموضوع ده.. وكام طلب إحاطة تم تقديمه وكام استجواب وكام سؤال تم توجيهه للحكومة اللى عايزه تبيع؟! عموما دى اختياراتكم وهؤلاء هم النواب الذين صوتم لصالحهم على حسابى أنا ابنكم الذي يحمل همكم ويدرك حجم مشكلاتكم.. وأنا لن أزيد في هذا الموضوع.. لكنى أطلب من الإخوة تحت قبة البرلمان أن يعلموا أن في بيع المستشفيات هلاكا للفقراء والمساكين أبناء دوائرهم. والذي يزيد الطين بلة.. أن هناك شركات أجنبية سال لعابها للفكرة وطرحت شراء مستشفيات حكومية بعينها حتى تتحكم في دواء المصريين.. وطبعا أنتم عارفين الشركات دى ممكن تكون جنسيتها إيه بالضبط. وأخيرا أقول: فوقوا يانواب مصر والحقوها قبل ما تتباع. مع تحياتى: أخوكم «نزيه صندوق عبد المتعال الناخب» نائب ساقط في انتخابات 2016.