أخيرًا.. وبعد العذاب والضنا.. والضرب والبهدلة، وحالة اليأس والإحباط التي حطت فوق دماغنا، فتكومنا علي الرصيف مثل المعيز الفطسانة، وقعت المعجزة التي لم يكن أحد يتصور حدوثها، وعلي رأي الحاج سنبل.. إشي خيال يا ناس، بدأت محاكمة الطاغية الكبير الحاج حسني بتاع أدي الشعب حقنة حرية يا حبيب.. قبل ما يقلب ويبقي ديب، والطاغية الصغير جمال أفندي، اللي كان لسه يا دوب بيتمرن في جتتنا علي الحكم لحد قفانا ما ورم، والشيخ علاء اللي كان مشارك علي نص جاموسة الوطن، ومعاهم بالمرة.. البعدة بتوع الشرطة والشعب في خدمة مولانا الفرعون، وكنت أتمني - وليس كل ما يتمناه المرء يدركه علي رأي النحاة العرب، أن تكون الحاجة أم جمال في قفص الحريم اللي جنبهم، مش عشان حاجة والله، بس أهه يتلم الشمل، بدل ما هي قاعدة حاطة أيدها علي خدها، وتغني.. وحدي.. قعدة في البيت، لكن.. ملحوقة برضه، هي يعني هاتروح فين. أخيرًا.. وبعد طلوع الروح، بدأت تلك المحاكمة التاريخية، لطايفة الحرامية والهجامين، والذين كانوا يغنون في نفس واحد.. لو أني أعرف خاتمتي في القفص.. ما كنت بدأت، وأعتقد أن هذه المحاكمة، سوف تكشف عن العديد من المفاجآت المذهلة، وتسحب أسماء أخري من قفاها، لأن القفص لسه فاضي وبراح، ويساع من الحبايب ألف، وعلي رأي المثل.. قفص المحب خروف، ومنه لله بقي عمر الخيام اللي قعد يفول عليهم، ويقولك.. فما أطال السجن عمرًا.. وما قصر في الأعمار طول القفص، لكن المشكلة.. أن تلك المحاكمة التاريخية، قد أثرت في نفسية ناس كتير، وجابتلهم الهلاوس والشلل الرعاش، لأن عندهم حساسة مثل جبلات وأندال زينا، أولهم.. أصحاب الفخامة والجلالة والسمو، اللي كان نفسهم تنخلعلهم عين، ولا ييجي اليوم اللي يشوفوا فيه زميل متكوم في القفص، لدرجة أن بعضهم يفكر الآن في إلغاء حكاية القفص دي من أساسها، حتي أقفاص الطماطم لأنها فال وحش، وممكن يعني.. يبقي القفص ده.. بانيو ولا جاكوزي عشان تبقي المحاكمة طراوة وشرحة وبرحة، وترد الروح. لكن أكثر المتأثرين بمحاكمة الفرعون، سيدة مصرية، قالت في التليفزيون بأسي شديد، حرام تعملوا في الراجل كده، كفاية إنه صاحب أول طلعة جوية، وإنه خلي مصر كلها كباري، تقوموا تنسوا كل ده.. وتحاكموه علي حاجة تافهة، وإذا كان علي الكباري يا هانم.. مش عايزينها، ياخدها كلها، وأهه يبقي يتمشي عليها من طرة لحد العنبر هو والأولاد والحاجة، وياكلوا حمص شام ودرة مشوي، وممكن لما الدنيا تبقي حر شوية.. يناموا تحت الكوبري.. أهه أحسن برضه من الزنزانة الخانقة أما حكاية إننا بنحاكمه علي حاجة تافهة فحقك علينا يا مدام.. لأننا فعلا بنعمل بحكمة الراجل اللي قال علمني الهيافة يابا.. قاله تعالي في الهايفة واتصدر، وبعدين يعني الحاج مبارك كان عمل إيه؟! يا دوب قعد يسرق في البلد هو وأولاده وعصابته ثلاثين سنة، الراجل كان مزنوق في القرشين، وعاوز يجوز العيال، خصوصًا أنه مناسب ناس أكابر، يعني ممكن يعايروه بالعفش، والجاتوه اللي جايبه من العتبة، وجايز كمان ما يرضوش يكتبوله قايمة بالعفش المعفن اللي شاريه من الرويعي، وبعدين ايه يعني لما سيادته يقتله ألف بني آدم، ويفقعله عين كام ألف تانين، ما احنا أكثر من الهم علي القلب، وبعدين هانشوف ايه؟! كفاية الذل اللي شفناه، بس ياريت يا مدام بقي.. كان سيادته طخ عيل من عيالك، أو فقع عينه، ونشوف ساعتها، هاتقولي نفس الكلام برضه؟! والا هاتكشفي راسك وتدعي عليه. عمومًا.. وبعيدًا عن هذا التقديس لفرعون، نتوقف أمام أغرب ما في تلك المحكمة، ففي الوقت الذي طلب فيه دفاع المتهمين، استدعاء ألف وستمائة شاهد لسماع أقوالهم، يعني علي ما المحكمة تسمعهم، يكون الشهود ماتوا.. وأهالي الضحايا ماتوا.. وأحنا كمان متنا، وسيادته قاعد في القفص يضحك علي خيبتنا، كان دفاع أهالي الضحايا حاجة تحزن بجد، فقد طلب أحدهم إثبات أن اللي متكوم في القفص ده.. مش حسني مبارك.. ده الدوبلير بتاعه، لأن حسني مبارك مات منذ عام 2004، وطالب بتحليل الحمض النووي له ولأولاده، مع أنه من غير تحليل ولا نيله، نقدر نؤكد لسعادتك أنه مبارك فعلاً.. لأن ربنا ما خلقش منه غير واحد بس، يعني مالوش زي، ومحامي آخر.. أخرج من جيبه الختامة.. وقالك.. لازم حد يختمهم عشان نعملهم فيش وتشبيه، ولذلك.. فأنا مرعوب لأنه بهذا الشكل، هايطلع المتهمين براءة، وأهالي الضحايا والمحامين.. هاياخدوا إعدام.
