من كام يوم .. كنت بقلب في الكراكيب .. جوه الفاترينة كنت حزينة .. وقلبي عجوز محتاجة لمليوون أراجوز يمكن أعرف أمحي الدمعة دي وأرسم ضحكة فلقيت صورة لجدو ونينة شكل الصورة دي كات* في جنينة صورة بالأبيض والإسود .. بس الخير خلاها ألوان ماما كات* واقفة وماسكة عروسة خالوا كده كان شكلة عيَّان لسه بدوَّر تحت الصورة دي أم جنينة فلقيت كراستي وأنا في تالتة كنت ساعتها البت الفلتة كل الصفحات صح ونجمة .. و لقيت رسمة لصاحبتي سلمي أخدتني لأيام البسمة خطفتني من عز العتمة .. ياه .. وحشتني عروستي العسولة أيوه عروستي ,, بتاعة أولي كنت أنا بتلكك عالفرحة بضحك قولوا يجي مليووون ضحكة بعلو الحس ولا تستغرب ولا تستعجب.. كله بنفس ! كنت أنا دايماً .. ألبس جزمة ماما الكعب كنت اتشنكل .. كان شئ صعب ماما تفطس من كتر الضحك عليا .. بحب ضحكة بابا .. بتقويني ولمسة ماما بتخليني أدي بالمليووون مركوب أيها كرب! أيها كرب ؟! كان فيه كروب طب ده أنا كنت كما العصفوور أمرح و أجري و ألف و أدوُر كنت أتنقل بين الوردات وسط زهور كنت أفرح من أيها بسمة تعدي السور ولا كنت أعرف إن البسمة انواع وبحور !! هما شوية .. ودخلت ستنا توتة عليا توتة قالتلي : مين دي يا خالتو اللي في الصورة ؟ شكلها نينة .. أيوه دي اللي ماسكة عروسة يخليها لينا نينة حبيبتي بحبها خاااالص بتزغزغني وبتحكيلي حواديت حلوة خالص مااالص أيوه يا توتة هيا دي نينة بس إزاي مكانتش حزينة ؟؟ أصل أنا كل ما أغمض عيني وأعمل نايمة أفتح حبة أبص ألاقيها .. جوه في بحر دموعها وعايمة !! لكن الصورة دي باهتة قوي مين سارق منها الألوان بس غريبة دي حلووة قوي أبيض و إسود بس جنان !! الصورة دي ألوانها الخير تعجبنا من غير تفكير دفء و بركة و حب لناس بتفكرنا بالإخلاص بعد شوية .. بعد ما خلّصت التعقيب لمينا أنا وتوتة حبيبتي بإدينا كل الكراكيب وقفلنا باب الفاترينة ومسكنا في إدين بعضينا ومشينا بخطوات وثّابة بندوس عالضحكة الكدابة و بنقتل جوأنا رتابة ناحية بيت جدتها النينة ست الكل وخيرها علينا *كات: اختصار من اللغة العامية لكلمة "كانت" وكتبناها كده عشان نسهل نطقها زي ما بتتقال
