كان رد فعل "موسيليني" إنه اتثبت من كلام ودموع عطية، حقيقي "بيسو" كان عنده حق لما قالها إن السهوكة والدموع بتجيب م الآخر، دموع "عطية" خلت "موسيليني" يرجع عن قراره وخلته يبقى عاوز يحفر في الأرض عشان يتجوزها..... كلمة "والنبي متحرمنيش منك" اللي هي اتدلعت وهي بتقولها له خلته مستعد يبيع هدومه عشان يتجوزها.....صحيح طيب والله بقى كلمة تعمل كل ده! أومال لو كانت حضنتك كنت هتعمل إيه يا منيل! جه يوم الأربع وخلصوا شغل هما الاتنين وراحوا عشان يشتروا دبلتين الخطوبة وصلوا ل"داماس"، "عطية" كانت مشترطة عليه "داماس" عشان بنت عمها اشترت دبلتها من هناك (منهج وزاري أصله غير قابل للتعديل!) المهم دخلوا طلب "موسيليني" من البياع يجيب لهم الدبل يتفرجوا عليها فسألهم البياع: "دهب ولا ألماظ؟"..... طبعًا كلمة ألماظ دي خلت "عطية" عينيها تزوووووغ، وهنا جالها إبليس جمب ودنها وبصوت وااااطي جدًا قالها "أوعي تقولي ألماظ يا عبيطة هتضيعي كل اللي عملناه قولي دهب واختاري أرفع حاجة وبعد ما الخطوبة تتم وقت ما تنزلي تشتري الشبكة ابقي افتري براحتك" المهم ردت "عطية" وقالت: "دهب لو سمحت، وياريت أرفع دبل عندك وعيار 18 مش 21" أخينا العريس اتبسط جدًا بأن حبيبته غلبانة وقلبها عليه ما كانش يعرف إنها بتحفر له ببراءتها حفرة ولما يقع فيها هايشوف منها وش ابن لذينا "بالضبط نفس الوش اللي انت شايفه من المدام دلوقتي" نقوا الدبل و طلبوا منه يحفر عليهم "موسيليني وعطية".. وهي طالعة من محل الدهب جالها إبليس وقالها بصوت واطي جدًا حاجة بس للأسف أنا مقدرتش أسمع هو قالها إيه .. بس بعدها علطول قامت "عطية" مشغلة محبس الدموع .. إتخض "موسيليني" جدًا وقالها "فيه إيه بس يا حبيبتي؟؟" قالت له "موسيليني بجد......." يتبع