مساء الخير على كل الستات اللي نفسها تعيش حياة زوجية هادية مريحة خالية من وجع القلب .. الصراحة انا بعتالكم النهاردة شوية حلول جربتها بنفسي ونجحت ودي خاصة بالأزواج اللي مش بيرضوا يتصالحوا بسرعة .. انتوا عارفين طبعا ان الراجل المصري عادة كرامته واجعاه ويحب يعيش سي السيد طول الوقت .. مش مشكلة نديله فرصته ونفرحه وباللمرة نبسط نفسنا . انا شخصيا جوزي بجد غلس وزعله تقيل وآخر ما غلبت من المصالح اللي عاده مش بتجيب نتيجة قلت اجرب الجديد بعد ما قعدت مع نفسي كتير لتدبير الخطة دي والحمد لله نجحت. الخطة الاولى : دخل البيت لقى بوستر كبير في وش الباب مكتوب عليه .. بحبك ومش قادرة على زعلك .. دمك تقيل صحيح لكن سامحتك .. انا نزلت المكتبة اللي تحت بيتي واشتريت فرخ كرتون كبير من بتاع الرسم وقلم فلوماستر وكتبتها بنفسي . الصراحة يا ستات الراجل ماكدبش خبر لقيته جايلي غرفة النوم ومبتسم جدا وابتدا يعتذر بطريقة غير مباشرة لغاية ما الحوار جاب بعضه وقضينا ليلة سعيدة والحمد لله الخطة التانية : كان زعلان مني نص نص فإكتفيت بإرسال رسالة حب رقيقة على موبايله بس وهوة لسة في شغله عشان يلحق يهدا , وفعلا أول ما رجع قال لي .. على فكرة انتي بتعرفي تجبيني إزاي . قلت في سري خير وبركة .. يا بركة دعا الوالدين وطبعا برضه قضينا ليلة سعيدة . الخطة التالتة : المرة دي هوة اللي كان مزعلني بس مفيش مشكلة من اني انا اللي ابدأ الصلح عل أساس ان مفيش فرق المهم اننا نتصالح .. نزلت إشتريت تي شيرت أبيض سادة مش غالي ورحت لمحل من المحلات اللي بتطبع الصور على الملابس وجبتله صورة ليه وفعلا طبعتها على وش وظهر التي شيرت وكتبت تحتها الراجل ده اللي دوب قلبي .. فأول ما شافها فطس من الضحك وأخدني في حضنه بس المرة دي ما قضيناش ليلة ظريفة لكن قعدنا نعيد ذكرياتنا الجميلة بتاعة أول فترة في تعارفنا . الخطة الرابعة : طلعت أول كارت كتبهولي بمناسبة أول عيد جوازنا وحطيته على صينية مع وردة من النوع اللي بيحبه ده غير القهوة اللي بيحب يشربها في وقت معين من اليوم .. بصراحة كان ليها مفعول السحر .. قام من مكانه وقال لي كلام اول مرة اسمعه منه وباس ايدي .. ومن غير ما تحسدونا قضينا ليلة جميلة جدا . يا جماعة .. افكار المصالحة كتير جدا لكن للي عندها النية أصلا .. اخلصي النية حتلاقي الأفكار نزلت عليكي بسرعة البرق .. انا بعت الرسالة دي عشان بجد حسيت قد ايه احنا بنضيع وقت في الخصام وبنضيع عمرنا كمان مع الدنيا اسهل واجمل من كدة بكتير .. قومي بقى صالحي جوزك بأي من الطرق دي أو غيرها حسب طبيعته ولو عجزتي إبقي إبعتيلي على فضفضة وأكيد استاذة نيفين هتنشره . هناء فضفضة شكرا أستاذة هناء على المخطط الرباعي الناجح جدا .. ولعله بداية طيبة لأزواج وزوجات على خلاف .. أفكارك رائعة ورقيقة , ارجو منك التواصل معنا دائما بأفكارك الجميلة . نيفين حجازي