يا مصر يا شهد.. يا مهد.. يا حنية.. الجنة أرضك ..ومية نيلك دوا ليه.. الحزن فرحك.. والليل دفا ونسمة معدية.. والنور نهار بيلف علي كل البشر.. غموسهم حنان.. وعمره ما كان حقد وأنانية.. القلب صافي والضمير دافي ويضمنا بصدق الكلمة الندية.. مع نسمة طلة من وشوش راضية باللقمة الهنية.. بتبتسم للدنيا والضحكة وردية. ومرت بنا الأيام بحلوها ومرها.. مع ثورة مصرية.. كانت بريئة جريئة.. في أولها.. لكنها ضاعت مع زحمة الأحلام.. كل الوشوش إتبدلت والضيء اللي كان يملأ القلوب أصبح ظلام.. وعلم بلادي إختفي.. وظهرت كتير أعلام.. وكل إللي في الجحور محظور.. طالع علينا وبيحدف ويفتي بأي كلام.. وكأنه أبو الفقه والتفسير والتنظير وألفة الاعلام.. وأن سألته سؤال في العلم يرد بغطرسة وبغل طافح ولافح من غير لجام.. بقي هوده الاسلام.. يا ألف حسرة وندامة عليكي يا مصر.. وياميت خسارة علي ولادك إللي كانوا عايشين زمان في سلام.. دلوقتي ماشيين جماعات وقلوبهم شتي بتفتش في الضماير والصدور وتكفر الخلق وتفجر في الطريق ألغام.. الجوع دموع ع الخد.. والفرش بقي ع القد.. والهم فاق الحد.. والسبت زي الحد.. والفقر يملا السد.. والجهل كهل وسهل فارد قلوعه وهل م المهد لحد اللحد.. والأبن يهين الأم.. والأب أصبح ضل.. والبنت غاوية النت.. والكلمة اللي كانت شهد.. صبحت وقاحة وحقد.. ودار الزمان بينا.. ونسينا أسامينا وكلامنا وسلامنا زي طلقات الرصاص وأشد. غربتنا في قلب الوطن طالت.. والزرعة جوه الغيطان مالت.. وكلمة الحرية ياريتها ما إتقالت.. جابت معاها الخوف.. ورمتنا تحت الأرض مع العالم التالت.. وقطر العلم فاتنا وبشر كانوا بعدنا سبقتنا ومن الجوايز نالت.. وإحنا ولا علي بالنا نايمين في مطرحنا مهما الدنيا إتهدت أو اتشالت.. وبنرمي همنا علي بعض.. ونعيش في لت وعجن.. والدموع علي الخدود سالت.. والفرحة ناسية القلب خايفة م إللي جاي.. يارب هون علينا يا واحد أحد مالوش تالت.. وإزرع فينا الأمل نبني بلدنا بعلم وعلوم والهندسة في المدرسة تصبح طريق للعقل المفتوح ع الرابع مش التالت .. ونكتب من أول السطر أحلامنا وننقوشها ع الجدران.. مع ثورتنا اللي جاية ع الجهل والطغيان.. وعلي كل قلب جبان.. والاسم قال انسان.. واقف ع الحدود.. بتفرج علي خيبتنا اللي ما وردت علي حي ولا ميت وبيضرب ويهدد بالحديد والنار والعيار فالت. وعلشان نبدأ من جديد.. لازم نعلم أجيالنا اللي جاية بقلب حديد.. ونقولهم العلم نور وهداية وبداية للايمان والقلب والعقل شموعه تقيد.. تصبح سنابل تقابل بالاحضان والسلام بالايد.. وننسي التصريحات والعناوين الكبيرة والمانشيتات وشغل التلات ورقات.. والمتاجرة بالدين.. وحلف اليمين والتهديد والوعيد.. ونرسم في دفتر المواليد كلمة حرية وعدالة اجتماعية بصدق النية وأحزاب قوية.. تلم الشمل وتجمع كل القريب والبعيد.. حقق ودقق.. وقوم من نومك رن الجرس وصحي الولاد.. وإردم علي الجهل وعلم الاستاذ قبل التلميذ وهات له حقه في الكادر بكرامة والحصة ليها ميعاد.. وألف باء إنسانية قبل زرًّع وحصد.. وعادل ويا أخته سعاد.. وعلمه القرآن بالرفق واللين.. والأدب والاحترام والطرح والقسمة علي إتنين.. هلال مع صليب كلنا من حواء وآدم أحفاد.. وقبل ما تكلمه في التكنولوجيا إبني فصول تسع العقول والعلم يصبح زاد.. ونعلمه إن النضافة من الايمان.. مش كلام محشور في الابدان والأجساد.. وقبل ما نلغي الكتاب والكراسة والقلم ونبدلها بلغة العصر ونقدمها للأولاد نعلمه الأول يعني إيه آي باد!!
