كنت خارجة مع خطيبي، وموبايلي كان معاه، ووصلني رسالة من اللي بيحبني، وعايز يرجع لي، وخطيبي ما صدّقش إني ما كلمتهوش من بعد الخطوبة.. وكذّبني، وقال لأهلي، وطبعاً سيبنا بعض، وقال لمامته، وقالت له: لو اخدتها لا إنت ابني ولا أعرفك. بس هو رجع تاني، وعايز يرجع لي عشان بيحبني؛ بس راجع بشروطه؛ منها إن أنا من إسكندرية، وهو من مكان بعد إسكندرية بساعة، والمفروض إنه كان هيجيب لي شقة في إسكندرية، وهنتجوز بعد سنة؛ بس بعد المشكلة دي، هو عنده شقة في بلدهم جنب أهله، قال لي تعيشي هناك.
وشغله بيجبره إنه يسافر أسبوع وأسبوع، فقال لي الأسبوع اللي مش هو موجود فيه ما فيش كلية، والأسبوع اللي هيبقى موجود فيه هو اللي يوصلني ويجيبني.
بس أنا خايفة من مامته لأنها ما تعرفش الحقيقة، خايفة تستحقرني، أو الأسبوع اللي هو فيه ما تعاملنيش كويس.. هو قال لها إنه بيحبني قالت له اعمل اللي يريّحك ما دام عايزها، وهو لما اتأكد إني كويسة رجع لي.
أنا مش عارفة أتصرف، هابقى عايشة في سجن وكل تصرف هاعمله هيشكّ فيّ؛ بس بابا قال لي: ده راجل كويس وبيخاف عليكِ وهيحميكِ.. أنا عارفة كل ده؛ بس مش عارفة خايفة من حياتي معاه بعد كده لأنه بطبعة شكاك جداً.. أعمل إيه ولا اتصرف إزاي؟