أنا باشكركم جداً جداً على الموقع الجميل ده، بجد حاجة تشرّف. أنا عندي مشكلة ونفسي إنكم تساعدوني؛ لأني بصراحة باثق فيكم جداً. أنا عمري 17 سنة، وفيه واحد كان بيحبني لما كنت في مصر؛ بس ما كنتش أعرف أوي. ومرت الأيام، وفي يوم من الأيام لقيت إيميل بيضيفني وأنا كنت بارفض لأني عارفة إنه ما ينفعش إن أنا أقبل حد ما أعرفهوش، ولما رفضت إضافته بعت لي رسالة بيقول فيها إن هو فلان وكذا وكذا. المهم إني بعد كده قبلته وقال لي إنه جاب إيميلي من أخته اللي هي صاحبتي، وفضلنا نتكلم مع بعض وكنت مبسوطة؛ لأني كنت مشتاقة أوي لمصر وأي حد من مصر؛ خصوصاً من منطقتي. وبعد شهور اعترف لي إنه بيحبني وإنه مش قادر يعيش من غيري، وإنه كان بيحبني من 6 سنوات وما عرفش ينساني. بالمناسبة هو 22 سنة، وأنا باحس إن هو بجد بيحبني وبيفضل مستنيني بالساعات لما أدخل، وأنا الصراحة قاسية عليه أوي وأنا قاصدة؛ مع إني واثقة جداً في أخلاقه؛ لأني عارفة أهله كويس جداً؛ بس ساعات بيضغط عليّ عشان أقول له إن أنا بحبه؛ بس ما بتبقاش طالعة من قلبي أوي. هو شاب كويس وحلو وبيدرس طب أسنان؛ بس أنا مش عارفة؛ ساعات باحس إني بحبه، يعني لما باتكلم معاه بابقى مبسوطة، ولو ما كلمتهوش بازعل، وباستمتع بالكلام الحلو اللي بيقوله؛ بس في نفس الوقت باحس إني ما بحبهوش.. يمكن عشان أنا محتاجة أسمع كلام حلو، وأقول كلام حلو؟ لو بحبه أعرف إزاي؟ ولو ما بحبهوش إزاي هاقدر أقول له؟ أعمل إيه؟ أنا بجد محتارة أنا عايزة أرتاح أنا نفسي أبعد عنه وأخلص وخلاص. أن عارفة إني لسه صغيرة؛ بس هو ده اللي حصل؛ وكل ما أحس بملل لازم أدخل الإيميل وألاقيه. أرجو المساعدة، وآسفة لأني طوّلت. وشكراً. مصراوية