مشكلتي إني محتارة وخايفة أندم. أنا كنت مخطوبة وكنت أعرف خطيبي قبلها بسنة، وكنا بنحب بعض أوي، ووقفت جنبه لغاية ما جالي البيت واتقدم لي، وكان أهلي رافضين علشان ظروفه والمستوى المادي بتاعه أقل مني؛ المهم أنا أقنعتهم وخلّيتهم يوافقوا. بس بعد ما اتخطبنا لقيت إنه بيفكر في نفسه وبس، وبيفكر إنه يكون جنب أهله ومامته، وإنه ما ينفعش إنه يسيب مامته ويسكن في مكان تاني؛ برغم إنه عنده ست إخوات بنات. والمشكلة كلها إن أنا باخاف من إخواته؛ باحس إنهم مش نفس البيئة بتاعتي؛ يعني ممكن أبقى قاعدة معاهم وأسمع ألفاظ مش كويسة ساعتها أنا باتضايق، وبافكّر في المستقبل.. أولادي هيبقوا كده. المهم إننا سبنا بعض بسبب إني مش عايزة أعيش في نفس المنطقة اللي مامته عايشة فيها علشان الاختلاط هيجيب مشاكل وأنا مش بحب المشاكل وإحنا دلوقتي سبنا بعض بقالنا 5 شهور، وهو كل شوية يكلّمني وعايز يرجع لي علشان هو بيحبني، وأنا مش عارفة أعمل إيه، محتارة موت، ومتأكدة إنه بيحبي؛ بس أنا خايفة من أهله. سما