أنا عندي مشكلة.. أنا اتعرفت على واحد من على النت، وبعدين بدأنا نحب بعض، شفته وشافني، اتعلق بيّ جامد وأنا كمان وحبينا بعض، وواجهنا كذا مشكلة وإحنا كنا يمكن نسيب بعض مش بسبب مشاكل بينا بس، كمان بسبب مشاكل حد حوالينا أو ظروف أو عادات؛ يعني مثلاً قلت له أنا ما ينفعش أكلّمك تاني لأني بجد خايفة من ربنا؛ مع إننا عمرنا ما عملنا حاجة غلط، ولا حتى عمري سلّمت عليه ولا مرة. المهم كنا بنرجع أحسن من الأول، لغاية ما قرر إنه ييجي يتقدم ليّ لأنه شايف فيّ الزوجة المثالية.. المهم جه اتقدم ليّ؛ بس هو عنده عيب خِلقي؛ بيشوف بعين واحدة، بس تحس إن شكله عادي؛ يعني عينيه الاثنين مفتّحة مش باين عليه غير للي يعرفه. أهلي شايفين إن ده ممكن يؤثر عليّ بعد كده، وإني ممكن أندم بعد كده؛ بس أنا كل ما افتكر مواقفه معايا بافتكر أخلاقه وأدبه وتديّنه وحبه ليّ واحترامه. أنا مش بابعت علشان محتارة، أنا بحبه؛ بس خايفة ليكون كلام أهلي صح.. أرجوكم ردوا عليّ، آسفة علشان طوّلت عليكم؛ بس بجد أنا محتارة. noorma