بسم الله الرحمن الرحيم.. أولاً إنتم ناس جميلة أوي وأنا بحب موقعكم ده أوي أوي.. مش هاطوّل عليكم؛ بس يا ريت حد يردّ عليّ ويقول لي أعمل إيه؟ أنا كنت مخطوبة من سنة تقريباً وما حصلش نصيب لأنه كان عصبي أوي وبيزعق وبيهينّي، وبصراحة ما قدرتش أستحمل مع إننا كنا بنحب بعض قبل الخطوبة.. المهم ما قدرتش أستحمل المعاملة دي ودُست على قلبي وسِبته عشان كرامتي وحالتي النفسية كانت وحشة جداً. اتقدم لي ناس كتير بعدها؛ بس أنا ما حبتش أدخل تجربة تانية غير لما أنسى اللي فات. حالياً فيه واحد متقدم دلوقتي.. اتكلمت معاه، قال لي إنه كان بيشرب حشيش وبيعرف بنات وبيحاول يفتح معايا كلام قليل الأدب؛ بس أنا باصدّه بس مش بقوة عشان مش باعرف؛ بس هو بيفهم ويسكت. بس هو أهله كويسين، شغله كويس، شكلاً مش أوي، كلبوظة شوية؛ بس مش عارفة أعمل إيه، وبيقول لي إنه بيحب الستات وهيحب يتجوز تاني عشان يجرب كل البنات.. مش عارفة، كلامه مخوّفني، وخايفة أوافق يطلع كده بجد، وأنا لسه متعقدة من التجربة اللي فاتت، وهو قال لي إنه عصبي برضه. أعمل إيه؟ أرجوكم ردوا عليّ.. وشكراً. habebomry