الحدوته دي من وحي الخيال و لا علاقه لها بالواقع و إن حدث أي تشابه في الأحداث أو الشخصيات فهو من قبيل الصدفة البحته و ربنا يستر كان يا مكان في سالف العصر والأوان ولا يحلى الكلام إلا بذكر النبي عليه الصلاة و السلام. المهم يا ولاد بعد ما أتأكدت كل حيوانات الغابه من أن مجلس الأسود طلع ضد ثورة الغابة و أثبتت كل الأدله ان الأسود وراء أحدث الفتنه و القتل و الحرق المتعمد في الغابه و سموهم كاذبون و هتفوا وقالوا ” قول ما تخفشي المجلس لآزم يمشي و يسقط يسقط حكم الأسود” طبعا في الوقت ده كانت الأسود و جماعة الثعالب و جماعة الفيران أصبحوا سمن على عسل ، الأسد الكبييير الهمام طلع في بيان و قال سنترك حكم الغابه في القريب العاجل وبرده الحيوانات ما صدقتهوش ، الأسود جروا على التعالب قلولهم ألحقونا الحيوانات أتقلبت علينا مش إحنا صحاب برده التعالب ردت و قالت إدونا حته من حكم الغابه و أحنا عيونا لكم الأسود قالت لهم ماشي خدوا مجلس الحيوانات لكم و أهه برده حكم للغابه ، طلعت الفيران وقالت فيها لاخفيها !!!! قالت الأسود طيب أقسموه مع بعض بس خلى بالكم لآزم تحطوا شوية حيوانات تانه معاكم برده علشان يبقى شكلنا حلوا ، المهم عملوا مجلس الحيوانات طبعا ياولاد عرفين عملوه إزاي ” التعالب و الفيران وزعوا برسيم بنص تمنه على الحيوانات الغلابه و الحيوانات إللي مش فهمه حاجه و قالوهم أحنا بتوع ربنا و إللي حينتخبنا حيخش الجنه ” و جرت الأيام و بدأت التعالب و الفيران تقلب الغابه على بعضها فأصبح بعض الحيوانات مع الثوره و البعض الأخر ضدد الثوره حيوانات تقول إيه يا جماعه ما خلاص مجلس الأسود قال حيمشي من السلطه قريبا و حيوانات تانية تقول في المشمش ، الحيوانات في الغابة حسوا بالمقلب إللي شربوه بقى ويلهم ويلين من مجلس الأسود و من جماعة التعالب و الفيران . جلس الحكيم يفكر ما الحل خاصتا بعد ما مجلس الأسود عاوز يشرب الحيوانات مقلب جديد و هو إختيار رئيس للغابه بعد الفيل المخلوع و عائلته ؟ فوجد الحل أن الأشبال تقلب على الأسود و تعزلهم من مراكزهم وخصوصا ان في محاولات سابقة و في أشبال كتييييييييير في السجن و ده الحل الأقوي أو ان الحيوانات تاخد طارها من الأسود و التعالب و الفيران و ده الحل الأخطر أو ان الحيوانات تعمل ثوره من جديد و يبقى نقطه و من أول السطر و ده الحل الأقرب يا معشر الأسود و الثعالب و الفيران أستقيموا يرحمكم الله قبل أن يأتي يوما لا ينفع فيه الندم و للحكايه بقيه إن كان في العمر بقيه