كان مربي شنبه بطريقة عجيبة كدة خليط من شنب عماد حمدي زكي رستم على استيفان روستي ويحب يلمسه بصوابعه كل لحظات ويرفع الطرفين ، خاصة وهو بيتكلم ... قائد كتيبة قد الدنيا بيحب يلبس الافرولات المموهة الأمريكاني دي اللي كان الواحد منها بالشئ الفلاني ، والنضارات الريبان الكلاسيك دي ، وكل يوم الصبح ...الطابور يتعمل ويتلطع العساكر والظباط والصف في انتظار نزول سموه من الاستراحة ...وينزل يتهادى في مشيته ببطء وهو بيبص حواليه وكأنه بيفحص حتى حبات الرمل ... لغاية مايوصل أرض الطابور ...كله مشدود وواقف كأنه قطعة حديد ....ثم يبدأ المحاضرة اللي ممكن تستمر لأكتر من نص ساعة مثلاً ...موضوع المحاضرة ممكن يكون حاجة مضايقاه ...حاجة هو مهتم بيها بس في كل الأحوال هي حاجة من أتفه وأثقل وأبوخ مايمكنك سماعه في ظروف زي دي ...ينتهي الطابور والعساكر تتحرك وهو واقف زي ديك رومي منتفخ وشوية وهيفرقع متعرفش هو زعلان ولا مبسوط ولا مش مركز يستمر اليوم ...كل اللي موجودين في المكان بيبقى قدامهم هدف واحد بيحاولوا يحققوه ...انهم يتجنبوا سيادة المقدم .....الهروب من أي احتكاك ..انه يشوفك أصلاً أو يصطادك وانت ماشي في اي حتة ...ياويلك وسواد ليلك سواء كان مبسوط ورايق أو متضايق في الحالتين هيستلمك وانت واقف انتباه .. لو مبسوط ..قابل كلام ورغي للصبح ...ويتمسى وانت وراه وهو بيحكي عن أي تفاهات في راسه ...أو يسمّع لك اللي قراه في الجرنال ويقول لك رأيه في أي حاجة في الحياة ولو زعلان ....لك أن تتخيل لما وصلت هناك وعرفت شخصيته بست ايد زمايلي القريبين مني علشان يخبوا سر إني صحفي وبشتري جرايد كل يوم ....كان طارق مندوب المشتروات بيخبي جرنال الحياة في ضهر الافرول وكأنه جايب لي بانجو .... لغاية ما قفشني في يوم ...وقد كان المهم ....هيروح من ربنا فين ... النوع ده سائد ومنتشر .....وسيادة المقدم ممكن يبقى لوا وأحياناً مشير ...لأنها سيكولوجية واحدة بتتحكم في الأغلبية ....مفيش ظابط ممكن يسمح لعسكري يتكلم في الطابور ...ولو عمل كده هيتدور مكتب وممكن يتحبس فأرجوكم محدش يزعل من الرئيس ...ولا يفهم غلط الحمد لله ان اللي رفع ايده عشان يروح الحمام روّح بيتهم عادي من غير مايتدور مكتب ولا ياخد 5 حبس والحمد لله ان الناس كانت قاعدة مش واقفة انتباه ....ده تسامح من رجل عسكري قضى طول عمره يكلّم طوابير ممنوع عليها الكلام الحمد لله انه اكتفى كرماً وتعطفاً إنه قال : مش عايز حد يتكلم تاني في موضوع الجزيرتين ....ومكملش ...واللي هيتكلم هحبسه ##