قبل اشهر قليلة كان رئيس مجلس ادارة عمارة كبيرة قريبة من كوبري قصر النيل .. الشىء الوحيد اللي بيميز العمارة عن بقية البنايات الاخرى ان سكانها من جميع الجنسيات العربية .. كويتي تلاقي .. سعودي .. عراقي .. يمني كله .. كله .. كانت مشاكلهم لاتنتهي .. وفي لحظة بسبب اسانسير عطلان يمسكوا في بعض وهاتك ياردح وشتيمة .. وفينك يارئيس المجلس.. لكن صاحبنا ولا هو هنا.. مش عارف يحل مشاكل سكان عمارته ويوفق بينهم ويجيب حق ده من ده ، فراح سايب العمارة تضرب تقلب وقال في نفسه : ايكش تولع .. خليهم ياكلوا في بعض .. هى عادتهم ولا حيشتروها . .. المشكلة ان صاحبنا اللي مقدرش ع الصغيرة تخيل انه حيقدر ع الكبيرة وقالك ارشح نفسي للرئاسة .. صحيح عنده كاريزما مش بطالة .. لكن لو رئاسة مصر تعتمد بس على الكاريزما يبقى حسين فهمي هو احسن واحد يمسك البلد. ..فاكر نفسه " عمرو" بن العاص وان معاه عصا "موسى" اللي فلقت البحر نصين. الجائزة : وظيفة محترمة في الجامعة تاخد منها راتب كبير ومتعملش اى حاجة. حاولوا يحرقوه .. لكن نسوا ان اسمه "...." .. وان النار متحرقش مؤمن .. كان نفسه يكون " الدستور" اولا .. لكن الاغلبية عايزة الانتخابات .. و " التحرير " كان محل اقامته 18 يوم .. ودلوقتي محل عمله ..شنبه يقف عليه الصقر .. راجل بحق وحقيقي .. بسيط ودمه زي العسل ودماغه موسوعة ..سياسة .. ادب .. فن .. سينما .. قفلوا له "القهوة " وعلقوا الكراسي .. فرجع ببرنامج ديني وفضح النظام وخلاه " فرجة " .. اسأله في اى حاجة يجيبك عليها .. واذا سألته : وايه اخبار الفلوس يرد ضاحكا : واضح ان مفيش اسئلة ويسك ع الموضوع. الجائزة : بنطلون ب "حمالات" من ملابسه الخاصة ..مش خسارة في اللي بيحبوه· طويل القامة .. قليل المقام والقيمة .. ماكنوش في السجن عاملين حسابه واحتاسوا في البدلة اللي تيجي على مقاسه .. قفشته الكاميرا مرة بيقزقز لب في المجلس .. ملحقش يتهنى بشهر العسل .. واهم حاجة عنده في السجن ان " افروله " يبقى " نظيف " الجائزة : لو حصل ورجع تاني لمنصبه حيشغلك مسؤول كبير في بنك بنص مليون جنيه حتى لو كنت طبيب بيطري· بيشتغل في مجلة كان اسمها في السما .. جابها الارض .. وتحمل اسم عملاقة من عمالقة الصحافة .. أم اديب كبير .. اسمه " عبد " امين لجنة السياسات و " الكمال " ابعد مايكون عنه .. وفي سوق الصحافة ميسواش نكلة .. الف رحمة ونور على استاذ الاساتذة صلاح حافظ وغانم والشرقاوي. الجائزة : هدية .. عبارة عن 10 اعداد من المجلة الكبيرة لمًا كانت محترمة قبل مايمسكها· "سىء " و " بلاء " .. من سخافة الاتنين اتحدى اللي يتفرج عليهم " 48 دقيقة "ولو تشوف " بلاء " متشعرش ابدا بالهنا والسرور .. حاجة كده بيتي .. مدمنة اكل حشي .. آخرها تقعد على الطشت تاخد الغسيل " فومين " .. اما سىء " ف " ببساطة " كده جاب مع زميلته واحدة متأجرة اثناء الثورة .. وامسك ياجدع سبق اعلامي محصلش .. اجندات اجنبية وتدريب في قبرص .. ويسأل الاتنين : انت بتتكلمي جد .. مش بقولكم ان المدسوسين في الميدان اكتر من الثوار ذاتهم .. كان قلبنا حاسس ان الحكاية فيها " إن " .. ومن ساعتها بقى الموضوع ده " محور " حياته .. ضحوا بخالتي " بلاء " وخلًوه هو يحكي " حدوتة مصرية " .. بس خايبة زيه.. ومحدش من ساعتها طايق يبص في وشه ولا في قفاه. الجائزة : حلة محشي معتبرة من الست " بلاء" بعد ربنا مارحمنا منها وقعدت في البيت· زعيم بالاسم فقط .. لو تشوف افلامه تحس انه اتمرمط في تراب مصر .. اجاد " اللعب مع الكبار " وحارب " طيور الظلام " وعرفنا من خلاله الراجل المصري الغلبان " المنسي " وساعة الجد ولسه النظام واقف على حيله قالك عيب كده .. الرمز بتاعنا محدش يهينه .. وبلاش اللمة الكدابة دي في ميدان التحرير .. وكأنه 30 سنة كان " نايم في العسل " وفجأة لقى " مدرسة مشاغبين " .. بس على حق .. فراح قالب ع الوش التاني .. بس محدش صدقه وقالوا عليه راح ولا جه " هلفوت " . الجائزة : ممكن تزوره وتواسيه دلوقتي وهو قاعد في "عمارة يعقوبيان بشرط انك متكنش " مشبوه ". ومادام الشىء بالشىء يذكر .. واهو كله طلع تمثيل في تمثيل ف " شيخ العرب " اقل نفر في الناحية اجدع منه .. كان ماشي صح في " سكة الهلالي " وسهرنا معاه " الليل واخره " ورحنا له لحد " الحلمية " .. لكنه ماشي ورا الست بتاعته اللي مش عاجبها العجب ولا الصيام في رجب .. واجمل حاجة في رمضان السنة دي انه مالوش مسلسل .. ومتهيألي ان مفيش حد حيتفرج عليه تاني حتى لو عمل فيها " محمد على باشا ". الجائزة : لو لك قضية ممكن يترافع عنك ببلاش زي ماعمل مع " عايدة ". اخبار .. اهرام .. " .... " .. ايوه صح .. لولا الثورة ماكنش شاف المنصب بعينه .. لكن البركة في معركة " الجمل " قصدي يحي الجمل .. صاحبنا مدخلش جرناله بقاله 12 سنة .. وكان في ديل اعلامي صاحب مؤسسات ومذيع في الاوربت .. ولأنه حبيبه جدا عيًنه رئيس تحرير جرنال قريب من تمثال " نهضة مصر " .. يطبع منه الفين يرجع له 5000 .. جرنال متعرفلوش ملة .. وخدها مني يابن الحلال : حتى لو بقيت رئيس جمهورية مش رئيس تحرير .. وحياة ابويا مانت " نافع ". الجائزة : منتج من منتجات الشركة اللي كان اعلانها بيقول: محمود ايه ده يامحمود لو عايزه .. تلاقيه في " دكان شحاته " اللي في شارع " الريس عمر حرب " .. مخرج عبقري وحيفضل اسمه " خالد " للابد في حياته وبعد عمر طويل .. كلنا شفنا دموعه بجد وهو خايف على المتحف .. مصري ابن مصري .. مش مدعي بطولات .. الجائزة : هو بيحب ام كلثوم وممكن يهديك شريط " انت عمري "
