رموز الثورة

أنبل رموز الوطن مطلوبة للتحقيق
ومسافة الحريات يوم بعد يوم بتضيق
والثورة متبعزقه ما بين فريق وفريق
وولادنا من غير دليل مشيوا فى ألف طريق
وحتى (موسى) قعد ع الكرسى بقه فرعون
يارتنى ما أديته صوتى وكنا جبنا (شفيق)
. . .
أنبل رموز الوطن محتارة بين فريقين
فريق فى حب الوطن ضحى بعنيه الاتنين
وفريق عماه الطمع والحكم باسم الدين
وطلع فى ظلم الوطن العن من الكافرين
قلبى عليك يا وطن الشط تاه منك
وقعد على دفتك الجهلة والفاشلين
. . .
أنبل رموز الوطن يستهلوا ألف وسام
ويكونوا لينا الدليل والقادة والحكام
ويكونوا شط الأمان ما بين حلال وحرام
ويفهموا الجهلاء سماحة الإسلام
ويفكوا أسر الوطن من كل قيد ظالم
ويحرروك يا وطن من عبدة الأوهام