هو مين؟!!

أصعب سؤال يا مصريين
بكرة اللى جاى يحكمكوا مين
أسهل إجابة فى كلمتين
دا فى علم رب العالمين
لكن السؤال يا ترى..
الفجر جاى مليان حنين
وللا يادوب هلكان حزين
.......................
انتوا اللى أصحاب القرار
وانتوا بإيدكوا شمس النهار
أنتوا ساحات الانتظار
وأنتوا الهزيمة والانتصار
أنتوا العزيمة والانكسار
أنتوا اللى ممكن تزرعوا
أو تقلعوا أو تركعوا
أو تاخدوا تار
....................
لحظة قدر بتضمنا
علشان بلدنا كلنا
لحظة لوطن
لحظة مصير
لحظة لسنين
فكر وشوف
تختار لوطنك بكرة مين
شوف القوى شوف الأمين
شوف اللى نادى بعدل
ممكن بالعدالة نروح لفين
شوف اللى عايش ندل
هيخلينا إيه فى العالمين
شوف اللى نفسه وبس
إوعاك كلام الكدابين
إوعاك من اللى يقابلك
بابتسامة وضحكة صفرا
وقلبه مافيهوش ذرة دين
إوعاك خداع الغشاشين
......................
يا بر مصر.. يا كل دار
مصر خلاص طالبة العمار
مصر اللى صبرت عاللى راح
واللى سنين شايلة الجراح
واقفه بتصرخ من بعيد
بتقول يا ناس فكوا الحصار
عاوزة الأمان
فى كل بيت فى كل دار
دا أنا من سنين
واقفة وبأْسْتَنَّى النهار