كاملة أبو ذكرى: مسلسل واحة الغروب كان هيبقى أفضل لو تم تقديمه فى شريط سينما

قالت كاملة أبو ذكرى خلال ندوة تكريمها المقامة حاليا بدار الاوبرا المصرية ضمن فعاليات مهرجان القاهرة السينمائي: "المخرج مش ساحر مش هيحط العصاية على راس الممثل فهيمثل كويس، الموهبة بتاعته هي اللي بتحركني معاه ممكن أكون سبب اني اطلع المخزون اللي جواه".

وتابعت: "حظي كان حلو اني اشتغلت مع فنانين كبار صادقين بيبقى خوفهم على شغلهم كنا بنسند ضهر بعض في الشغل لاننا بنشتغل في ظروف صعبة وبنشتغل فوق 20 ساعه الممثل بيكون في حالة صعبة ولكن حالة الحب هي اللي بتحركنا احنا الاتنين وانا بقول ممكن السيناريو عظيم والاخراج هايل والموسيقى كويسة ولكن الممثل لو وحش كل دا مش هيظهر".

وأشارت خلال ندوتها: "السيناريو هو الأساس اللي بنطلع عليه كلنا ولكن اللي بيوصل للمشاهد هو إحساس الممثل والحاجات الباقية بتكمل احساسه، وأنا بشكر كل ممثل انا اشتغلت معاه وكل ممثلة حققوا احساسي أوالحاجات اللي عايزة أوصلها للمشاهد".
كما تحدثت أن مسلسل واحة الغروب كانت ترغب في تقديمه في شكل سينمائي، ولكن كان هناك صعوبة بالغة في تحمل تكلفة الإنتاج قائلة: "مسلسل واحة الغروب انا شايفه انه لو كان فيلم كان هيبقى أحسن كتير".

وحرص عدد كبير من نجوم الفن على حضور ندوة تكريم المخرجة الكبيرة كاملة أبو ذكري وهم إلهام شاهين، لقاء الخميسي، أمير المصري، عمر السعيد، يوسف عثمان، محمد العدل، ركين سعد، تارا عماد، حازم إيهاب، أحمد صيام وابنته بسنت صيام، ومدير التصوير محسن أحمد، محمود عمرو ياسين (جونيور)، محمود الليثي، توني، خالد عبد الجليل مستشار وزارة الثقافة لشئون السينما ورئيس جهاز الرقابة على المصنفات الفنية، ميرفت أبو عوف، حسين فهمي.

وكرمت المخرجة كاملة أبو ذكرى، فى حفل افتتاح مهرجان القاهرة السينمائى فى دورته 44 و تم منحها جائزة فاتن حمامة للتميز وسلمتها الجائزة النجمة نيللى كريم.

وانطلقت الدورة ال 44 من مهرجان القاهرة السينمائى الدولى، يوم الأحد الماضى في حفل كبير أقيم في المسرح الكبير بدار الأوبرا المصرية، بحضور وزيرة الثقافة المصرية الدكتورة نيفين الكيلاني وحشد كبير من نجوم الفن وصناع السينما والإعلاميين تكريم عدد من الشخصيات السينمائية الهامة وهم المخرج والمؤلف والمنتج المجرى بيلا تار بحصوله جائزة الهرم الذهبي لإنجاز العمر.

ويشارك في الدورة ال 44 من المهرجان هذا العام، 97 فيلما من 52 دولة في 4 أمسابقات مختلفة، ويبلغ عدد الأفلام الطويلة 79 فيلما، و18 فيلما قصيرا، بالإضافة إلى 10 أفلام كلاسيكية، في حين يبلغ عدد العروض العالمية والدولية الأولى 30 فيلما، مقابل 57 عرضا أول في منطقة الشرق الأوسط وشمال أفريقيا.