ديمقراطية

أيوه هى ديمقراطية
ديمقراطية بس هى
ع الطريقة الأمريكية
إسرائيلى احتل دارك
قوم وقدم له التحية
سيب له دارك باختيارك
خلى عندك مفهومية
أصل مهما يكون قرارك
النتيجة هى هى
هو مات أسود نهارك
أنت مت ملكش دية
أما لو فكرت نوبة
قلت أجيب حقى بإيديا
والشيطان قالك بطوبة
تخزى عين السمّاوية
تلقى فوق راسك عقوبة
من الحبيبة الأمريكية
وإن ما قلتش يابا توبة
تبقى أمك إرهابية
إسرائيل تسرق وتنهب
بس غلبانة وضحية
إسرائيل تهدم وتضرب
مش جرايم إنسانية
إسرائيل بالكدب تكتب
ألف فيلم وتمثيلية
وإن تلومها وللا تعتب
يبقى منك للسامية
الفلسطينى اللى صابر
نص قرن ع الأذية
فيها أيه لو تنو صابر
نص تانى ويبقو مية
واليهودى ابن الأكابر
يبنى دولة صهيونية
واللى يبقى ساعتها فاكر
يبقى يرفع كام قضية