أحمد الشحات

يا مصر يا أم الهرم هما ولادك دول
اللى بقى فعلهم أكتر كتير م القول
وأديكى شوفتى الفدائى (أحمد الشحات)
إزاى طلع للعلم لأجل الغمامة تزول
......
يا مصر كل الولاد حالفين على حبك
يا حتة من قلبهم وهما حتة من قلبك
أديكى شوفتى بعنيكى (أحمد الشحات)
من قبل ما تطلبيه لقتيه هنا جنبك
......
يا مصر قومى افرحى ماتدمعيش تانى
يا مالكه قلبى ومالكه كل وجدانى
شوفتى يا مصر الفدائى (أحمد الشحات)
لما سمع ندهتك قال أمى عايزانى
......
طلع بروحه ينوب عن حب ميت مليون
همّ خلاصة البشر وهمّ عطر الكون
وكلهم فى هواكى (أحمد الشحات)
عاشقين ترابك وكُله فى هواكى يهون
......
الله عليك يا ولد يا حر يا عايق
والله علم إسرائيل كان شكله بيضايق
نزعه وفرح قلوبنا (أحمد الشحات)
أصل العلم فوق سمانا شكله مش لايق
......