رساله إلى الميدان

هاتوا ايديكم كلكم شدوا عزيمة بعضكم
واتجمعوا واتوحدوا علوا منارة مجدكم
كفاياكوا من غدر السنين كفاياكوا آيام الآنين
بعد النهارده معدش حد يا نور عيونى زيكم
......
قلبى وروحى عندكم و ف كل لحظة بضمكم
حضنى بقى وسع الميدان شايف فى حضنى حضنكم
يا نبت مصر يا طيبين يا أغلى من نور العنين
ياللى على أرض الميدان فديتوا مصر بدمكم
......
قلبى معاكم كلكم قلبى نبض على حسكم
من بعد نومنا فى ليل طويل هل النهار على فجركم
يا شباب بلادى يا مخلصين يا شباب بلادى المُلهمين
الدنيا وشبابها الجميل فرحوا وغنوا لنصركم
......
يا نفحه من نور ربكم ياللى فديتم شعبكم
ياللى رفعتم رسنا فوق وزرعتوا فينا عزمكم
يا فرحة القلب الحزين ياللى رويتوا العطشانين
ياللى التاريخ راح ينحنى ساعة ما يكتب عنكم
......
قلبى معاكم كلكم بنده بكلمة فى ودنكم
اياكوا من صوت الشيطان اللى بينكش جنبكم
اياكوا ابليس اللعين يدخل ما بينكوا بكلمتين
اياكوا كلمة من حسود فى الليل تشتت شملكم
......