أيمن بهجت قمر يعلق على نجاح "النفسية": عدالة إلهية وحقى محفوظ بالقانون

علق الشاعر أيمن بهجت قمر على نجاح أغنية محمد الشرنوبى "النفسية" قائلاً على حسابه ب"فيس بوك": "عدالة إلهية" فى إشارة إلى أن الله نصفه بعد طرح أغنية تحمل نفس الفكرة والاسم واتهم أصحابها بسرقة أغنيته، حيث رد بهجت قمر على أحد التعليقات حول توارد الأفكار قائلا: "لا.. سرقة وفي اجراءات قانونية أخدتها وحقي محفوظ الحمد لله".
تعليق قمر علي نجاح أغنية النفسية

وكتب قمر على حسابه تحت عنوان "تأملات في مجال العمل اللطيف": "طبعا مش كلهم.. بس معظم أول ناس وقفت جنبهم في كل مرة كانوا محتاجيني فيها عشان حقهم ما يضيعش هما أول ناس وقفوا في وشي عشان حقي أنا بعد كدة يضيع! أول ناس كنت أنا ضهر ليهم مع أول محطة يا باشا كانوا هما هما بنفسهم ضهر لغيري!".
وأضاف: "يجروا ينادوا لك إلحقنا فين العدل القانون! ولما تيجي أنت بعد كده تقول لهم طب أنا ليا حق فيه قانون يا أساتذة يقولولك ده ظلم وحسبي الله ونعم الوكيل ويحللوا لنفسهم ويعيشوا في دور المظلومين المقهورين وده لسبب واحد بس أنهم لسه شباب وفي بداية حياتهم وعلى فكرة الظالم مش مهم يبقى كبير أو مشهور ممكن تبقى لسه في بداية حياتك وتضرب بالزمالة وبالأصول وبالقوانين عرض الحائط مفيش مشكلة بس أنت نفسك هتضرب في نفس الحائط ده وابقى قابلني لو عملت حاجة في حياتك لإن ما بني على باطل فهو باطل وأنت ابتديت مشروع ويلا نفسي واخترت دور الشهيد وصدقته حتى لو دوست على الأعراف والقوانين والزمالة أما الناس اللي أنا بعنيها بالكلام الفاضي ده.. بقول لهم الرجال مواقف مش كلام وأنا بالمواقف بينت أمارات كتير وعمري ما استنيت منكوا حاجة في المقابل بس إنتوا خلاص فقدتوا قدر كبير أوي من احترامي ليكوا وفهمت انكوا حافظين مش فاهمين لأ ومعندكوش ضمير على فكره بس عموما محدش بيتعلم ببلاش ويلا نفسي يا باشا بعد كده ووهم التضحيات والمواقف البطولية فوقنا منه وخليني أوفر كلامي وطاقتي لشغلي ولنفسي وعيلتي وللناس اللي بتقدر وبس وأنت ساند ونظَّر وادعم.. وألف شكر يا أولاد الأصول ".
تعليق قمر علي حفظ حقوقه بالقانون

يذكر أن أغنية الفنان محمد الشرنوبي استطاعت أن تحقق نجاحا كبيرا فور طرحها أمس السبت على "يوتيوب" وعلى مواقع السوشيال ميديا حيث استطاعت أن تقترب من 2 مليون مشاهدة في 24 ساعة على موقع "فيس بوك" وهي من كلمات أيمن بهجت قمر وتوزيع إلهامى دهيمة وألحان محمد يحيى.