الخطيب ل"جمهور الأهلى" فى ذكرى تأسيسه: زعماء الأمة وضعوا أسس كيان نفتخر به

وجه الكابتن محمود الخطيب، رئيس النادى الأهلى كلمة لجمهور القلعة الحمراء، بمناسبة مرور 111 سنة على إنشاء النادى، وذلك أثناء تواجده فى رحلة علاجية دولة الإمارات العربية الشقيقة.

وإلى نص الكلمة..

بسم الله الرحمن الرحيم،
جمهور مصر العظيم،
جمهور الأهلى الوفي،

زى النهاردة من111 سنة.. اتأسس النادى الأهلى العظيم.

"زى النهاردة .. بنينا على أرض مصر هرما رابعا .. وكتب رموز النادى الأوائل أول صفحة فى تاريخ كبير جدا عظيم جدا.. بيزيد كل يوم وبيكبر كل لحظة.. زى النهاردة يوم 24 أبريل سنة 1907 فتح الأهلى بابه لمجد عايش معاه وعايش بيه وملازمه.. زى النهاردة ابتدينا حلم بقى فى كل بيت والأهم فى صدور أولاده ومحبيه المخلصين".

"يوم 24 أبريل مش يوم عادى فى تاريخ الأهلى .. لأنه كمان اللى اجتمعوا فى اليوم ده مش عاديين؛ ولأن الكيان اللى أصبح حقيقة بعدها مش عادي.. فى اليوم ده وضع عظماء الأهلي.. الزعيم مصطفى كامل ، والزعيم طلعت حرب، وأمين باشا سامى وعمر بك لطفي، وقبلهم الزعيم الوطنى الكبير سعد زغلول، وضعوا الأساس لكيان تفخر بيه مصر كلها والوطن العربى والعالم.. الكيان ده مكمل بولاده وأعضائه وجمهوره.. الكل فى حلقة.. فى سلسلة من العطاء وإنكار الذات علشان يفضل الأهلى الحاجة اللى بتجمعنا كلنا واللى بنفخر بيها كلنا".

"زى النهاردة بدأت الحكاية، وكل يوم .. جيل بيسلم الراية.. راية العزة والفخر والأمجاد اللى بترافق مسيرة أعظم نادي.. النادى العظيم بمبادئه قبل ما يكون عظيم ببطولاته.. النادى اللى مؤمن إن جمهوره وأعضاءه ومحبيه ولعيبته هم البطولة الأهم .. لأنه مؤمن أن البطولات من صنع أبناء الأهلي.. الرجال والسيدات".

«كنت أتمنى أكون بينكم النهاردة علشان نحتفل مع بعض بالمناسبة دي، لكن قدر الله وما شاء فعل، وأطمئنكم إنى بفضل الله بخير، وأنا ممتن جداً لمشاعركم اللى غمرتمونى بيها طول الفترة اللى فاتت واللى منحتنى أمل كان أقوى من الألم، وإن شاء الله قريب جداً هنكون مع بعض ونحتفل بعيد الأهلى وببطولة الدورى الأربعين وببطولات كتير حققها أبطال الأهلى فى كل اللعبات الرياضية».

«قريّب إن شاء الله هنكون مع بعض، واحنا بنحتفل سوا.. لازم كمان نفكر فى بكرة.. لأن شعارنا دايما هو «تاريخ.. مبادئ.. تطوير».. كلنا مع بعض حنبنى الأهلى سوا .. وحنفذ برنامج عائلة الأهلى سوا .. وحنحافظ على هذا الكيان العظيم اللى مطلوب دايما إنه يكون فى المقدمة لأن دا قدره ودا طريقه اللى مش ممكن يحيد عنه أبداً .. طريق الانتصارات والبطولات، والتاريخ اللى بيصنعه كل يوم».

«طوال الفترة اللى فاتت الأهلى ما غابش عنى لحظة واحدة .. مش باتكلم بس عن الأمور الإدارية ومتابعتها كل يوم لكن عن الأهلى البيت والأسرة والحالة اللى بترافقنا فى كل الظروف وبفضل الله وبيها بنقوى على الظروف .. ومن بعيد وبالذات فى الاختبارات الكبيرة بتحس قد إيه إن فضل ربنا عليك كبير .. إنك بتنتمى لكيان قادر إنه يسكنك ويعيش جواك بهذا الشكل ويمنحك طاقة فوق الوصف.. الطاقة دى هى سر الأهلى وهى سر المحبة الكبيرة اللى صنعها فى ال 111 سنة واللى جعلت منه أكبر من مجرد نادى بنحبه أو بنشجعه .. جعلت منه حياتنا وعمرنا».

«النهاردة بنقول لجمهور مصر العظيم وجمهور الأهلى الوفي: كل سنة وأنتم طيبين .. كل سنة وانتم حراسه وصوته وفرحته، وبنقول لكل رموز الأهلى وإداراته على مر السنين: شكراً ليكم على كل اللى قدمتوه لبيتكم والتاريخ مش هينسى اللى قدمتوه على مدار سنين طويلة مرت فيها على الأهلى أسماء كتيرة كل واحد ساهم بجزء فى بناء الكيان اللى بيجمعنا كلنا.. وبنقول لنجومه فى كل الألعاب: كل سنة وأنتم على منصات التتويج ترفعوا اسم الأهلى وتكتبوا التاريخ للأهلى وليكم اللى يستاهل كل نقطة عرق مننا .. وبنقول لأعضائه: كل يوم وانتم متجمعين على حب الأهلى اللى بيفخر بيكم زى ما بتفخروا بيه».

كل سنة ومصر بخير ويا رب كل أيامنا تكون أعياد .. كل سنة والأهلى بخير .. كل سنة واحنا مع بعض متجمعين فى حب مصر وحب النادى الأهلى اللى هيفضل بالجميع .. فوق الجميع».

والسلام عليكم ورحمة الله وبركاته.