مسامحك ياريس

عهد وللظلم أسس
ونظام خّون وعسس
ومصر بلدنا عزبة
وصاحبها الباشمهندس
ولا ذكرى ليوم كويس
ولا فكر وناس تسيس
لكن وبنية صافية
قلبى مسامحك ياريس
لوكنت بيا حاسس
ساهر على حقى حارس
كنت ح اخليك ياريس
على عرش القلب فارس
ع العين والراس أشيلك
وافضل أحلف بجيلك
واقول النصر نصرك
واقول النيل دا نيلك
كان بيا العمر ماضى
وتعبت وكنت راضى
وقلت كتير لنفسى
ايه ح يفيد اعتراضى
كان أبعد أمنياتى
بكرامتى أعيش حياتى
ولمصر العز كله
مش عايز شيئ لذاتى
سنين أنا مش عاددهم
شوفتك عايز تزيدهم
بصيت لولادى لحظة
وصرخت أرجوك تسيبهم
لكنك قلت نفسى
وبدأت أشعر بيأسى
ناديت يسقط نظامك
وهتفت بكل بأسى
أنا جيت رافع ايديا
رديت بالنار عليا
ليه استعجلت يابا
كنت استنيت شويه
بذخيرة حقد حية
راح فوق التلتمية
وبأمر مين ياريس
دخل المطاط عنيا
كانت حواليك عصابة
زادهم دم الغلابة
وسايبهم فيا ياكلوا
فريسة ف وسط غابة
خوفت على ولادى منهم
دول مين اللى يآمنهم
ولا رب يخافوا منه
ولا أب عشان يدينهم
دول ناس مابيرحموش
دول ياخدوا مايدفعوش
وياكلوا مهما ياكلوا
على طول مابيشبعوش
بسببهم راح زمانى
ضاعت هيبتى ومكانى
وف آخر الصف واقف
وأنا كنت الأولانى
قسوة عنادى وعنفها
اللى ف عيونى شوفتها
فكر ياريس وافتكر
تعرف منين أنا جبتها
أنا رد فعل لفعلتك
وضحية ليك ولصحبتك
أرض الوطن من قسمتى
وانت الرحيل من قسمتك
ذاعوا البيان ومشيت
على نفسى قوام ناديت
مش دا اللى كنت عايزه
أومال أنا ليه بكيت
ماقصدتش م البداية
تتنفس غير هوايا
تبعد عن مصر لكن
انت اخترت النهاية