من إمتى؟

من إمتى كُنا يا وطن
واقفين فى ضد؟
من إمتى ماشيين الطريق
وفى عكس بعض؟
من إمتى يبنى فيك بطل
وأخوه يهد؟
من إمتى كان بِينّا الشيطان
فارد قلوع؟
من إمتى فيك واحد شبع
وأخوه يجوع؟
داحنا اللى فينا المصطفى
حاضن يسوع
من إمتى كُنّا مقسومين
وما بنّا سد؟
دول كام سؤال جوايا
نايمين من زمان
آن الأوان أسمع بقى
لسؤالى رد
من إمتى كُنّا يا وطن
واقفين فى ضد؟
ده أنت اللى كُنت تدوس
ولا يهمك وحوش
وجنود ولادك داسوا فوق
كل العروش
وكتير قُصادك انهزم
أقوى الجيوش
إياك تقول إن اللى فات
ماضى وكان
ارجع واقرا كتاب تاريخك
من زمان
من كسرى فُرس
وإلا من قيصر رومان
إزاى بقى دلوقت
سيبت الأمريكان
ويّا الصهاينة فى أرضنا
ممدودة مد؟
من إمتى كُنّا يا وطن
واقفين فى ضد؟
القدس فين راحت وفين
مهد المسيح؟
وفى أرض هارون الرشيد
مليون دبيح
إزاى قدرت تنام وفيك
الشام جريح؟
إزاى بقينا ألف ملّة
وألف دين
شيعى وسُنّى أو مسيحى
مقسومين
داحنا اللى عيشنا فيك
حياتنا موحدين
صوت الأذان ينده قوام
جرس الكنيسة يرد
من إمتى كُنّا يا وطن
واقفين فى ضد؟