ريم أحمد عن رقصها على أغانى المهرجانات: "دا إيفينت للتوعية بمرض السرطان"

دافعت الفنانة ريم أحمد، صاحبة دور ابنة الفنان محمد صبحى فى المسلسل الشهير "ونيس" عن الفيديو الذى تم تداوله لها عبر مواقع التواصل الاجتماعى، حيث هاجمها رواد موقع التواصل بسبب رقصها على أغانى المهرجانات.
ونشرت "ريم" منشورا لها عبر حسابها الشخصى بفيس بوك: "أولاً أنا مدربة زومبا اللى مايعرفش إيه هى الزومبا هى مجموعة من أنواع الرقص والفيتنس اللى على مستوى العالم كله (صلصة-مارينجى-ريجاتون- فلامنكو-هيب هوب) وأى نوع من أنواع رقص الشعوب، والزومبا قائمة على أداء مجموعة من الحركات تساعد على التخسيس".
وأضافت: "الفيديو نازل من إيفينت لدعم وتوعية عن مرضى السرطان تحت رعاية مستشفى بهية، وبتظيم الجامعة الأمريكية، وكان سيدات فقط، بس للأسف الفيديو اتصور من إحدى الحاضرات ونزل على الفيس بوك واليوتيوب وتداول بشكل غير لائق تمامًا".
وتابعت: "الكومنتات المسيئة لى وللأستاذ محمد صبحى وإن المسلسل باظ وصورته اتشوهت كل ده ليه؟ أنا خريجة معهد الباليه والمعهد العالى للفنون المسرحية.. موضوع أدى تربيتك وهى دى ريم وكل الكومنتات دى حقيقى مش فاهمة إيه علاقتها وإن أصلا الفيديو ماكنش المفروض يتصور لأنه داخل حفلة للسيدات فقط".
وتساءلت: "إزاى بنى آدم يقدر يغلط فى بنى آدم تانى وهو مايعرفهوش على المستوى الإنسانى؟.. تحكم على حد ليه؟ تحكم إزاى وأنت أوأنتى أصلا ماتعرفهوش، إيه علاقة إن دى تربية ونيس وأن الناس مصدومة؟ كل الناس بتعبر عن سعادتها بالرقص حقيقى أنا مستاءة من الكومنتات غير اللائقة والخارجة على حاجة أصلا أنا ماغلطش فيها ده إيفينت سيدات فقط وأاستغل بشكل خاطئ.. هل الصفحات اللى نزلت الفيديو عندهم مهنية إنهم زى ما نزلوا فيديو تحت مضمون خاطئ هينزلوا التوضيح؟! طبعا كل واحد وضميره.. وبشكر كل الناس اللى دافعت عن الموقف وحاولت تصحيحه".