عمال الآثار للرئيس: مرتبنا لا يكفى إيجار الشقة

وقف عمال الآثار الذين ينتمون إلى أكثر من قطاع من قطاعات المجلس الأعلى للآثار صباح اليوم أمام مجلس الشعب، وهتفت حناجرهم بأكثر من مطلب عبروا عنها عبر عدة وسائل منها ما كتبوه فى لافتات كثيرة رفعوها حتى تصل إليها عيون المسئولين عبر نوافذ المجلس.
"اليوم السابع" التقى بهؤلاء العمال الذين رغبوا فى إرسال استغاثتهم برئيس الجمهورية ود.أحمد نظيف رئيس الوزراء والدكتور أحمد درويش وزير التنمية الإدارية الذى رفض قرار تعيينهم، وقالوا فى رسائلهم:
"عيب أوى على بلد أثرية زى مصر أنها ترفض تعيين عمالها اللى شغالين فى الآثار وشايلين البلد على أكتافهم، ده فيه 8 آلاف درجة خاوية فى الآثار محتاجين ناس تشتغل فيها هيدوهم لمين بس؟".
يقول يوسف سعد العامل بالآثار، والذى تظاهر اليوم ضمن مجموعة عمال الآثار المتظاهرين أمام مجلس الشعب للمطالبة بتثبيتهم فى العمل: أنا شغال فى الآثار بقالى 10 سنين، وكل سنة يقولوا هنعينكم فى شهر 7، هنعينكم فى شهر 1، وتعدى السنة ومحدش يتعين، وأضاف إذا كان وزير الثقافة "الدكتور فاروق حسنى"، حسب تعريف العامل له، وافق على تعييننا، وقال هنعينكم على حسابى، ولن نكلف الدولة أى شىء، يبقى ليه الدكتور درويش يرفض يعينّا.
أما سيد يوسف فقال أنا بشتغل فى الآثار من 96، ولغاية دلوقت مرتبى 250 جنيه وأنا بصرف على أمى ومراتى وعيالى التلاتة، يقولى بق البيه الوزير "درويش" أعمل إيه فى كوم اللحم والمرتب اللى بيخلص من اليوم الرابع فى الشهر.
وقال العامل معوض فكرى أنا بقالى 25 سنة شغال، كنا بناخد ثلاث جنيهات وسبعين قرشا "فى اليومية"، وبعد كده بقى أجرنا 8 جنيه، وأضاف"إحنا مرة كنا فى مشروع وكانوا عاوزين يرفعوا 6 طن وشركة المقاولات معرفتش، رفعها 6 من العمال بتوعنا".
وقال محمد حيدر أنا شغال بقالى 13 سنة ومعايا تمهيدى ماجستير وأعمل فى المجلس الأعلى للآثار، وكل مرتبى اللى أحصل عليه 250 جنيه، ويتساوى أجرى مع أى عامل مؤقت، والحكمة إنى مليش واسطة علشان أتعين، وكل ما نسأل عن التعيين يقولوا لنا مفيش تعيين، ولكنا نفاجئ بأصدقائنا الحاصلين على الدكتوراه بيتعينوا، وعيب قوى لما المجلس الأعلى للآثار يكون بيصرف على البلد، واللى طالع عينهم فى الجبل مش بنشوف الأسفلت، وميزانيتنا خارج ميزانية الدولة أعمل إيه ومرتبى لا يكفى إيجار الشقة وعندى طفلين، واليوم اللى بغيب فيه مش بيتحسب.
أما أحمد محمد حسن بقالى 8 سنوات ومرتبى 245 جنيها، ولو تعبنا يوم واحد بيتخصملنا، واللى بيطلع معاش بياخد 78، يعنى لو حبيت آكل لحمة يوم فى الشهر هحتاج على مرتبى 2 جنيه عشان يكمل حق كيلو لحمة، ده يرضى مين بس.