نداء ل"حبيبة ومتحرشى ومأفورى معرض الكتاب": مكانكم مش هنا

"القراية حلوة مفيش كلام" ومعرض الكتاب فرصة لكل اللى بيحب يقرا واللى لسة عايز يتعلم يحب يقرا، ده "كلام جميل وكلام معقول ما أقدرش أقول حاجة عنه"، بس فيه ناس فاهمة المعرض غلط ورايحة لأهداف تانية خالص، هما دول اللى لازم نوجه لهم النداء من موقعنا هذا فى المعرض: "مكانكو مش هنا".
عزيزتى اللى عايزة عريس:
الظابط الأمور اللى واقف ع البوابة، أيوة أبو نضارة ده اللى شعره ناعم ما بيبقاش مركز فى رسمة عين "صوفيا لورين" اللى انتى عاملاها الساعة 11 الصبح، يعنى أنتى كدة بتضيعى وقتك ومجهودك ع الفاضى.. استنى هقول لك ليه؟
بصى، أولا بيعدى على الظابط ده كل يوم 115 "كيم كارديشيان كات آى لوك" و359 "سموكى آى" مستوحاه من ميك آب هيفا فى برايم فى ستار أكاديمى و450 شفايف من بتوع أحلام ذات اللون الفوشى الفاقع، فيا عينى الظابط ده هيركز فى مين ولا مين؟
ثانيا: لو افترضنا جدلا إنك "علقتى فى دماغه" لأى سبب من الأسباب فهو أكيد لو شافك وأنتى خارجة من المعرض الساعة 5 ونص، والميك آب سايح على وشك و"الكات آى" اتحولت بفعل اللف والمرمطة إلى "باندا آى" فالظابط الأمور أكيد مش هيبقى طايق يبص فى وشك، فليه "الأفورة" من الأول؟ وليه تخلصى باليتة الألوان كلها فى المعرض وإنتى عندك فرح بنت خالتك آخر الشهر، ده اللى بيسموه "إهدار موارد".
عزيزتى الشيك أوى:
مساحة معرض الكتاب حوالى 80 ألف متر، يعنى هو آخر مكان تفكرى تلبسى فيه الكعب ال15 سنتى، ليه بئا؟
عشان هتمشى "تلؤى" على الأسفلت، وكلها نص ساعة، آه والله نص ساعة فقط وهتبقى ماشية زى الجمل اللى فجأة غرق فى رملة الصحرا البيضا، فسيبى الكعب برضه لفرح بنت خالتك اللى آخر الشهر.
ثانيا: معرض الكتاب بيزوره حوالى 2 مليون شخص كل سنة، يعنى لو رايحة يوم السبت مثلا هيشوفك حوالى 150 ألف فإوعى إوعى تلبسى البنطولون الإسكينى "التايجر برنت" اللى جبتيه أول الشتا، هتقولى لى ليه؟ هرد بكل بساطة: عشان هتبقى إنتى فى حد ذاتك المعرض.
عزيزى المتحرش:
بص بئا، البنت اللى تلاقيها داخلة المعرض بتجرى وشعرها منكوش أو الطرحة اتقلعت منها دى وشايلة شنطة على ضهرها، دى مش جاية عشان تعاكسها، لأ أبسوليوتلى دى صحفية آه والله زمبؤلك كدة، فبلاش تمشى وراها لحد ما تدخل قاعة الندوات وتقعد فى الكرسى اللى جنبها وتقولها:"ماى نيم إيز محمود، كان يو سبيك إنجليش؟" ليه بئا؟ لإن البنت دى رئيس قسمها بيبقى مكلفها بتقرير 500 كلمة فى 4 دقايق ونص، فسؤال "كان يو سبيك إنجليش؟" هيترد عليه بأحلى "استريت إنجليش وعربى" سمعته فى حياتك.
عزيزتى الأم:
محدش قال أبدا ما ناكلش فى المعرض، بالعكس لازم تاكلى وتأكلى محمد ويوسف لما يتعبوا من اللف بس والنبى والنبى يا شيخة بلاش حلل وصوانى يعنى الرقاق والمحشى ممكن يستنوا للغدا، خليكى فى ساندويتشات الجبنة واللانشون والعصير.
عزيزى الأب:
لو فاكر إن المعرض هو المكان اللى هتعرف ولادك فيه على الشاورمة السورى والمناقيش، "راجع نفسك" دى لا شاورمة ولا سورى والساندويتش كله بيبقى سلطة، ولا بيعرفوا يعملوا مناقيش، خلصوا المعرض وإطلعوا على أبو رامز أحسن.
عزيزى الحبيب:
جميل إنك تاخد حبيبتك وتروحوا المعرض، بس لو روحتوا اشتريتوا كتاب "كيف تختار شريك حياتك؟"، وقعدتوا فى الجنينة اللى أدام صندوق التنمية، وفضلتوا تقلبوا فى الصفحات مع بعض بطريقة "مش ولا بد" فاهمنى طبعا، كل الناس هتسيب المعرض وتقف تتفرج عليكو آه والله، مكانك مش هنا جنينة الأسماك فاتحة من 10 الصبح ولو عندك حساسية من السمك الأورمان كلها شجر.
كل معرض وانتوا مصريين.