النقاب والحرية المزاجية

الدنيا ماشية بضهرها ولا إيه، إيه اللى حصل فى الدنيا.. الكويس بقى "كخة" لازم يتحارب لازم يتهان لازم ينضرب لازم يتمنع لازم ميوصلش لازم مايدخلش لازم يقف فى طابور لازم ولازم ولازم..
أما الوحش فبقى كويس يلبس زى ما يلبس وياكل اللى ياكله ويشرب اللى يشربه ويشم اللى يشمه ويعمل أى حاجة، يعرف أى حد يعمل مع أى حد أى حاجة "وافهمونى غلط" طبعاً ما الوحش حر.. واللى بيشرب سجاير حر.. واللى بيشرب حشيش حر.. واللى بيسهر لحد تلاتة وأربعة الصبح على القهوة حر.. واللى بيضيع فلوسه على الفاضى والمليان حر.. واللى تيلبس هدومها بعد ما تدهن نفسها بصابون علشان الهدوم تدخل فهيا حرة.. واللى تبين جسمها ويشوفها اللى يسوا واللى ما يسواش حرة، والبنات اللى بتسهر فى شارع جامعة الدول العربية عشان كذا وكذا حرة.. واللى عاوزة تكلم واحد حرة.. واللى تفترى على واحد وتقول اتحرش بيا حرة.. واللى بيسرق فلوس الناس عينى عينك تحت أى مسمى حر.. طبعاً ما إحنا فى زمن الحريات.
كل واحد حر ما دام ما بيضرش حد تانى غير نفسه كلام جميل، بس نيجى عند واحدة عاوزة تلبس نقاب وتستر نفسها.. لأ.. أستب وقف عندك يا جدع.. وحاسب يا عم الحج.. لازم نعرف هى هتلبس نقاب ليه.. لازم هى إرهابية أو بتتنكر عشان تعمل حاجة كدة ولا كدة، أو يمكن واحد لابس نقاب عشان برده يعمل حاجة كدة ولا كدة أو حتى لابسة النقاب علشان عاملة عاملة ومش عايزة حد يكشفها أو يمكن لبساه عشان تعرف تغش فى الامتحانات أو رايحة تقابل واحد ومش عايزة حد يشوفها حيل كتير ممكن الواحد أو الواحدة يستخدم فيها النقاب كل الحيل دى واضحة زى الشمس.. وهى بس الحيل اللى عليها العين.
يا أخى الناس دول يشلوا أو خلاص شلونى مسمعوش عن الآية اللى بتقول "إن بعض الظن إثم".
أنا عارف إن فى ناس بتستخدم النقاب غلط "مهمة الحكومة إنها تكشفهم وتحاسبهم وكمان تشدد العقوبة.. إزاى دى مش بتاعتى.. فى ناس بتوع قانون ممكن يعملوا الكلام ده وأنا مش هقول حلول علشان الحكومة لو عايزة تلاقى حلول هتلاقى بس الموضوع فيه "إن"، إيه هى محدش عارف غيرها.
طب أنا هسأل سؤال لو جندى غلط هتعمل إيه تحاسب كل الجنود أو تمنع التجنيد؟ ... ولو دكتور غلط نمنع الطب ولا نحاسب الدكتور ونشدد العقوبة عليه؟ ... ولو طالب غش نمنع الامتحانات ولا نعاقب الولد اللى غش ويكون عبرة لكل الناس... سبحان الله.. ربنا يجعل لنا حدود وبين لنا كيف نقيمها ولكننا ضيعناها علشان كدة إحنا مش نافعين، فمثلاً لو اللى بيسرق قطعنا إيده مش هيسرق تانى والمنتقبة لو اكتشفنا إنها تستخدم نقابها فى أعمال ممنوعة فلتأخذ عقابها الذى لو علمته غيرها لانتهت عماتريد القيام به وهكذا، هو أنا اللى هقول لكم تعملوا إيه دا أنتم دكاترة فى القانون وعلماء فى الدين بس زى ما أنا قلت الموضوع فيه "أن".
يا سادة موضوع النقاب أمر سهل بس الموضوع محتاج قليل من الحكمة، أنا هطرح الموضوع بمثال بسيط لو أن واحد ومراته قاعدين فى البيت وجات لها صاحبتها منتقبة هو بيثق فى مراته وزى الفل والحمد لله.. وطبعاً هيسبهم يقعدوا مع بعض لوحدهم، طب إيه المانع إنه يخلى أمه تيجى تسلم على صاحبتها المنتقبة دى ويقطع الشك باليقين. قيس على كده كل مكان عاوز أتأكد فيه إن كانت المنتقبة اللى قدامى منتقبة بجد ولا محتالة.
أحبائى أولياء أمورنا وسادتنا وحكومتنا وكل اللى يرضيكم.. أرجو أن تبحثوا الموضوع من جديد وأن تحلوا لا أن تضلوا حتى لا تضيعوا على بناتنا وأخواتنا امتحاناتهن.