ارقص يا سلام

سقفه...سقفه...سقفه
وانزل يا سلام فى الساحه هنا ف وسط الزفه
وارقص...
ارقص يا سلام
ارقص على أرض الإسلام
مافيناش ولا قاضى ولا إمام
مافيناش غير حبة أحلام
متساقه لساحة الإعدام
ارقص يا سلام
ارقص على أرض الموت والدم
وبيوت إتهدمت فوق أهلها هدم
وابعتلى سلام
لأهل الإسلام
واسألهم إيه غير دينهم أهم
ارقص يا سلام...
وإضحك على كل شعوب الأرض
وابعتلى سلام لشعوب عربيه بتاكل بعض
وانا هسكت وأرفض حتى كلامى
لإنى ضعيف مش قد الرد
ارقص يا سلام
وابعتلى سلام
لعيون بتنام
ولا فى الأحلام
وتقوم على صوت
أطفال بتموت
وعيون م الخوف...
بنشوفها..نشوف الإستسلام
ارقص يا سلام
ارقص على روح الإنسان
على شعب إتشرد وإتخان
على طفل إتمنى فى يوم يكبر
فى وطن يشبه باقى الأوطان
ارقص وهقولك على كلمه
قالهالى أبويا فى يوم الحكمه
(السلام محتاج لقوه تسنده
وقت ما يهددنا حد نهدده
قبل ما يموتنا إحنا نموته)...
هو دا معنى السلام
وإللى عنده معنى تانى
بكره يرقص السلام على جتته
ارقص يا سلام
ياللى إنت اصلاً مش سلام
وابعتلى سلام
للى يعرف سكته