وائل كرمى يكتب: بابا نويل يا بابا نويل

استنى شوية يا بابا نويل عايز منك حاجة غريبة
كل سنة تيجى بالليل وتوزع ف هدايا عجيبة
اتفضل أطلب وأنا أديك بس بسرعة الله يخليك
عايز.. عايز.. حزر فزر عايز إيه؟ حزر فزر نفسى ف إيه؟
نفسى ف وطن يكون دفيان يكون شبعان
مش خايف ولا مرعوش ولا بردان
يكون طيب ع ولاده وأسد ع العدوان
غلبت أدور لوطنى على دوا ولا أدور لنفسى على وطن غيره من الأوطان
لا دى صعبة أوى يا مان حتى أنا نفسى عايزها كمان
مشى وسابنى بابا نويل
وقعدت لوحدى بالليل
كان جوايا حلم جميل
ياريته تحقق من كام جيل
نفسى فى وطن يكون حنان
يكون منان
نفسى بجد أنا تعبان
ولا كتير على كمان
أنى أحلم دا أنا إنسان
ولا الحلم شكله تقيل مترد على يا بابا نويل يا بابا نويل