بلاش تظّلمْها

وصورتِك بس باقيالى وأنا لحالى
ومتغرب ما بين نظره تونّسنى
وأفتش جوه إحساسى ولو ناسى
حبال روحك تدفينى وتحرسنى
وأتقلب على جناب الوجع والشوق
وأبص لفوق وأحاول أن أشوف نجمه
وأتخيل جمالِك فيها لابس طوق
وليل بيروق ما بين رقه وبين نسمة
ولابسة بلوزة من تولى وبتقولى
تعالى شِم ريحة سِحرها ف سِحرى
وتدلع عليا بضحكة وتميل لى
وتفرح لما أبصلها ف طول شهرى
تواسينى وأنا حيران ومتضايق
تقولى أكيد ماهيش قاصدة تجرّح فيك
ظروفها بس تمنعها ولو رايق
أكيد هتحس بوجعها وشوقها إليك
بلاش تظلمها وتزوٌد ألمها آلام
تلاقى الشوق معذبها أكيد زيك
أكيد الراحة نسياها ولا بتنام
أكيد محتاجة لو ضمه حنين مِنك
وفجأه صحيت من الأحلام لقيت نَفسى
بكلم روحى وجروحى محوطانى
حضنت الصورة من تانى وأنا نِفسى
تكونى ساكنة بين قلبى وأحضانى