ملامحه البسيطة ولدغة اللسان التى تلازمه فى بعض كلماته فى أثناء سرده تفاصيل ارتكابه جريمة قتل جاره، تدفعك للتعاطف معه.. سجله الجنائى الخالى من أى سوابق إجرامية يدل على أنه مواطن طبيعى لم يدخل أبواب قسم الشرطة سابقا إلا للحصول على فيش وتشبيه، لتقديمه للعمل الذى يشغله كسائق فى مدرسة خاصة بأكتوبر. "رمضان أحمد"، البالغ من العمر 38 عاما والمقيم بأحد عقارات حى بولاق الدكرور الشعبى، روى ل"اليوم السابع" تفاصيل ارتكابه الجريمة، قائلا: "أنا اسمى رمضان.. شغال سواق بمدرسة خاصة بطريق مصر-إسكندرية الصحراوى، متزوج من فترة طويلة، لكن ربنا مارزقنيش بأطفال حتى الآن، البيت اللى عايش فيه أنا وزوجتى مكون من 7 طوابق ويقيم به 3 أسر، فى الفترة الأخيرة من حوالى شهرين سكن سائق تاكسى وسائق توك توك بأسرتيهما فى الطابقين اللى فوقى، وقبل ما يسكنوا كان فيه مشكلة بنعانى منها، وهى انقطاع المياه لما يقرب من 12 ساعة يوميا، واتفقت مع صاحب البيت إنى أشترى ماتور مياه على حسابى، مقابل إنه يخصم ثمنه من التأمين، ووافق فعلا صاحب البيت واشتريت الماتور". ويضيف "رمضان" قائلا: "بالرغم من تشغيل الماتور، لكن كانت مشكلة انقطاع المياه ما زالت بنعانى منها، لكن الجيران الجدد مش متعودين على كده، وبيحسبوا إنى أنا السبب، ويوم الحادث فوجئت بزوجة سائق التاكسى الساكن فى الطابق أعلى شقتى بتخبّط على باب شقتى، وبتشتكى من انقطاع المياه، ولما أكدت لها إنى ماليش ذنب وإن دى مشكلة دائمة ماصدقتش كلامى، واتصلت على زوجها السائق، وبعد ما يقرب من ساعة حضر، ولقيته بيخبّط على الباب، ولما فتحت فوجئت بيه بيتخانق معايا، وحصلت مشادة كلامية بينا، وفوجئت بيه بيضربنى بالبوكس فى وجهى، وبدأنا نتبادل الضرب ومسكنا فى بعض، ووقعنا على الأرض، وأثناء الضرب شاهدت سكين المطبخ ملقاة على الغسالة، وقدرت إنى أوصل ليها، وضربت السائق فى بطنه، بس ماكنتش أقصد أضربه.. أنا كنت بادافع عن نفسى علشان كان بيضربنى، وأنا مش قادر عليه". ويستطرد المتهم قائلا: "وبعد ما ضربته بالسكين لقيت دمه بينزف، وواحد من الجيران نقله للمستشفى، لأنه كان لسه عايش، وبعدها قفلت الشقة، ورحت الشغل علشان أستأذن وأرجع أتابع اللى حصل، لكن لما وصلت لقيت ضباط المباحث مستنيينى وقبضوا علىّ". ويضيف "رمضان": "أنا غلبان وماليش فى حاجة، أنا أصلا باخاف أدبح فرخة، وكنت بادافع عن نفسى". تفاصيل الجريمة كشف عنها بلاغ تلقاه اللواء محمود فاروق، مدير الإدارة العامة لمباحث الجيزة، من ربة منزل، أفادت فيه بمقتل زوجها "محمد.س" عامل بمنطقة بولاق الدكرور. وعلى الفور، انتقل المقدّم هشام حجازى، رئيس مباحث بولاق الدكرور، إلى محل الواقعة، وبإجراء التحريات، تبيّن للمقدم هشام حجازى، رئيس مباحث قسم شرطة بولاق الدكرور، أن وراء ارتكاب الجريمة جار الضحية، ويُدعَى "رمضان أحمد" سائق بمدرسة خاصة. وعلى الفور، توجّه الرائد حسام العباسى، معاون مباحث قسم شرطة بولاق الدكرور، إلى مقر عمله، وتمكّن من القبض عليه، وبمواجهته اعترف بارتكاب الجريمة، تمّ تحرير محضر بالواقعة، وبإخطار اللواء كمال الدالى، مساعد وزير الداخلية لأمن الجيزة، واللواء محمود فاروق، مدير الإدارة العامة للمباحث، تمّ إحالة المتهم إلى النيابة التى أمرت بحبسه 4 أيام على ذمة التحقيقات، وصرحت بدفن الجثة بعد تشريحها، واستمعت لأقوال الشهود وباشرت التحقيق.
