رسالة من أخ لأخيه

ما تستغربش
ماحدش فينا ما بيغلطش
ولو بصيت على نفسك
هتلقى حاجات كتير تكسف
ولا تتقلش
وأنا والله من دمك
وليا فيك
ويجرحنى كتير جرحك
ودمع عنيك
وبفرح قد إيه لفرحك
ولنجاحك
لكن بزعل قوى منك
لما ماجيش على بالك
نسيت أول هدية
نسيت أول عيدية
نسيت لمتنا
ساعة المغربية
ساعتها كنت شايف فيك
دفا وحنان
شعور إنسان
قولى مين قدر يسقيك
جفا وقسوة وأنانية
مهماش فيك
وضيع حبة الإيمان
ما فكرتش ف حقى عليك
ولا مرة
ما جربتش تدى فرصة
للذكرى
تصحى شوية الحنية
اللى فاضلينلك
تحس شوية بقى بيه
أنا وأهلك
لا عاوز جاه ولا واسطة
لا عاوز مال ولا صدقة
عاوز أحس
إنه ليه أخ بجد
معايا فى فرحى وف حزنى
مهواش حد
كل اللى رابطنى بيه
حروف اسمه شبه اسمى