نشطاء "تويتر" يرفضون "وثيقة الأزهر لنبذ العنف".. طارق: "بلد بتاعة وثايق صحيح".. نهلة: "مش حل".. محمد: "ارحمونا بقى"

رفض العديد من نشطاء "تويتر" وثيقة الأزهر لنبذ العنف، رغم أن بعضهم حاول إيجاد مبرر لها، لكن الأغلبية رفضت كل المبررات، وقاموا بتدشين هاشتاج بعنوان "وثيقة نبذ العنف"، للتعبير عن وجهة نظرهم فيها.
قال ياسين أبو الإسعاد: "وثيقة نبذ العنف.. فى العباسية حازمون والعسكر اتقال: اطلبوا من القاتل أن يتوقف لا من المقتول أن يرحل، معلش الليمون بينسى.. آفة حارتنا النسيان".
نهلة: "فى الآخر هى مش حل، واللى اشتركوا فيها عمالين يخسروا من رصيدهم عند الثوار، ده إذا مكنش بقى صفر عند البعض، وكل ده فعلا عبث".
بركات قال: "وثيقة نبذ العنف هى عاملة زى قانون مكافحة الإرهاب؛ رخصة للقتل والإبادة تحت غطاء قانونى".
محمد سامبو: "جبهة الإنقاذ هاتوا أى عيل فى 3 ابتدائى يكتبلكم موضوع التعبير ده أحسن من كده".
أحمد طارق: "هو حسام مؤنس ووائل خليل ود محمد أبو الغار، ممضوش على الوثيقة ولا مضوا؟ وثيقة نبذ العنف".
محمد الدالى قال: "لكل واحد عامل فيها أبو الثورة، وبيشتم فى الناس يمين وشمال وبألفاظ.. زيه، ومنهم طبعًا معظم النشطاء.. ارحمونا بقى...".
وقال من أطلق على نفسه طرف خفى: "وثيقة نبذ العنف ملهاش أى 3 لزوم، ولا هتتطبق، فين الداخلية والحرية والعدالة من الوثيقة.. وجبهة الإنقاذ لا تمثل الشارع".
عبد الرحمن بدر القصار: "اطلعت على وثيقة نبذ العنف وهى رائعة ومهمة، والأهم هو تعميق معانيها فى نفوس المصريين وإعمالها على الأرض".
وقال من أطلق على نفسه إنسان طبيعى: "وثيقة نبذ العنف.. يعنى الداخلية لو قتلت حد هنعرف ندين حد؟؟ آه.. طبعًا، هى الداخلية هتقتل حد غير لما يكون عنيف!".
مصطفى عبد الله قال: "وثيقة نبذ العنف، هل اللجنة ال 12 ستكون تحت إشراف الرئاسة؟".
وقال أحمد الشاذلى: "أكتر من 20 بنى آدم اتكلم فى المؤتمر الصحفى.. ومفيش واحد منهم قال كلمة زيادة عن التانى.. وثيقة نبذ العنف".
أحمد طارق قال: "وثيقة نبذ العنف, وثيقة الأزهر, وثيقة السلمى, بلد بتاعة وثايق صحيح!!".
مينا إميل كتب: "أنا مش معترض على وثيقة نبذ العنف، بس فين الحل؟ يا فرحتى، ومين من اللى وقع على الوثيقة ديه ليه علاقة بالعنف، انتوا كده بتشتغلوا نفسكوا".
وقال تشى ياسين: "أليس هناك مادة فى الدستور تمنع مشاركة الأزهر بشكل مؤسسى فى الحياة السياسية؟ إذن كيف تشرف المؤسسة على هذه الوثيقة أيا كانت بنودها؟".
وقال أيمن سالوس: "وثيقة الأزهر.. الصورة بانت دلوقتى أكتر من الأول.. البرادعى طلع الإستبن بتاع الأمريكان، واللى بيحصل تصليح الإستبن بتاع الإخوان".
مصرى: "البرادعى والإخوان كانوا حلفاء قبل الثورة... عيشوا الواقع... الراجل كل موضوعه إنه اتنصب عليه مش أكتر .. والدليل".
أمنية حرب: "وثيقة الأزهر.. هى الناس زعلانة ليه من الوثيقة، مع أن اللى مضى عليها هو بس اللى ملتزم بها! واللى مضى مش فى الميدان ولا له كلمة عالميدان".
إنجى الأبيض: "وثيقة الأزهر ياتموت وانت واقف.. يا تعيش وانت راكع.. لا للوثيقة".
منى أسامة: "وثيقة نبذ العنف.. يارب بقى ينفذوا اللى فيها ويتفقوا.. والشارع يهدا والبلد تهدا.. عشان بجد أنا تعبت".
جلوب إيجى قالت: "نحيى كل من وقعوا عليها وأعلوا مصلحة وطننا الغالى! نرجو من الرئيس المصرى تقدير ذلك واحتواءه لأن شرعيته فى خطر".
وقال مؤمن عيد: "وثيقة الأزهر.. نفسى فى وثيقة لنبذ كذب الإخوان وأعوانهم".