كلاف البهايم وأبو هرجة وبعضشى يناقشون «الفاشية»!

مذيع التلفاز مخاطبا ضيف الحلقة: ولكن يا سيدي كيف ترى مستقبل مصر في الفترة القادمة، خصوصا بعد ما حدث في 3 يوليو الماضي من استجابة القوات المسلحة المصرية لإرادة شعبها الأصيل، وقيامها بعزل الرئيس السابق محمد مرسي وجماعته، وهو نفس الحدث الذي تطلق عليه جماعة الإخوان وأنصارها "انقلاب يوليو العسكري المشئوم"؟
المحلل الإستراتيجي سامي الساعاتي: للأسف مازلت أرى أن مصر لم تتحرر بعد من مرحلة التخبط اللا واعي بين جنبات نفقها الأسطوري المظلم، كما أرى أننا - ويا للعجب- بعد ثورتين مجيدتين، ليس بينهما أكثر من سنتين، لم ننجز أكثر من استبدالنا فاشية دينية بفاشية عسكرية سوف يستمرؤها معظم المواطنين رغما عنهم متوهمين أنهم على حق، وما ذلك إلا رغبة منهم في الاستقرار المنشود، وسعيا للخلاص من الحالة السائلة للدولة الهلامية التي تتأكد يوما بعد يوم، ونحيا فيها جميعا رغما عن أنوفنا.
حسنين كلاف البهايم: إلا قولي يا واد عوضين يابن عمي.. إيه موضوع الفاشية اللي الراجل الأمير أبو نظارة كعب كوباية في التليفزيون ده بيقول عليه.. وبعدين إحنا جالنا الموضوع المنيل ده منين وإزاي.. وهانخلص منه امتى بالصلاة ع النبي؟!
عوضين الفلاح بعد أن سحب نفسين معتبرين من الشيشة: والله بيتهيأ لي كده يا حسنين يابن عمي أنه بيتكلم على أيام مرسي وجماعته، داهية لا ترجعهم، وبيقولك إنهم كانت أيامهم "ضلمة" وأفعالهم "سوو"، وكان همهم يفشوا غلهم فينا وفي عموم المواطنين باسم الدين، قوم ربنا سلط عليهم عمك السيسي اللي هو في العسكرية عشان يفش غلنا وغله فيهم، ليه بقى.. لأن ربك سبحانه وتعالى يمهل ولا يهمل، وزي ما قال الشاعر القديم: لا بد من يوم معلوم تترد فيه المظالم، أبيض على كل مظلوم وأسود على كل ظالم.. على الله تكون فهمت يا سيدي!
حسنين وهو يزووم: أوممممم.. شوف إزاي.. صحيح ربك بيسلط أبدان على أبدان، دي الفاشية دي طلعت واعرة قوي، ربنا يكفينا شرها ويجملها بالستر.
أبو هرجة ضاحكا: طب علىّ النعمة ما أنتو فاهمين أي حاجة، يفشوا غلهم إيه وكلام فاضي إيه.. بيقولكم فاشية..يعني الحالة كانت مفشفشة ع الآخر أيام الإخوان ومرسي بتاعهم.. قوم جبنا السيسي والحكومة الجديدة بتاعته عشان الحالة تنعدل.. قوم اتفشفشت أكتر وباينها خية يا إخواننا ووقعنا فيها ومش منظور ربنا ينصفنا منها عن قريب.. من حقدنا الأزلي ونيتنا الوحشة ونفسنتنا على بعض.. معلوم إن الله لا يغير ما بقوم حتى يغيروا ما بأنفسهم.. ولا إنت رأيك إيه يا عم بعضشي يا علامة الكفر يا متنور.
بعضشي ناظرا لهم من فوق لتحت: والله يا إخواننا أنا بفكر جديا أهاجر وأسيب لكم الكفر ده مطربق على دماغتكم.. حرام عليكم تعبتوني.. كل ما أقول إتنورتوا وربنا فتح عليكم ألاقيكم أنيل من الأول.. أمري لله..هانوركم المرة دي كمان..بس ربنا يجعله بفايدة.. شوفوا يا جدعان موضوع الفاشية دي خلاصته إن اللي يحكم البلد يحكمها "بالجزمة".. يعني الإخوان ما صدقوا وصلوا للحكم وراحوا حاكمينا بالجزمة.. واللي يفتح بقه يبقى ملحد وكافر وهايروح جهنم وبئس المصير.. قوم الناس كتمت في قلبها يا عيني لحد ما ربنا بعت لهم العيال بتوع تمرد.. قاموا ماضيين على الاستمارات بتاعتهم بالملايين.. وربنا هدالنا الجيش وقام معانا وخلصنا والحمد لله من الفاشية الدينية.. يعني من جزمة الإخوان.. قوم الراجل المحللاتي اللي في المخروب ده بيقول لك إن إحنا بعد غلب السنين ده كله ما عملناش حاجة غير إن إحنا بدلنا جزمة الإخوان بجزمة الجيش..ويا خوفي يا بدران لا يطلع كلامه صح ونسرح بفول نابت كلنا.
في آخر النهار يمر مسعد القهوجي بحسنين كلاف البهايم وقد وضع حذاءه المضمخ بروث البهائم فوق طقطوقة المقهى في مشهد عجيب..ثم بادره صارخا: إيه اللي أنت بتهببه ده يا واد يا حسنين.. داهية تاخدك؟!
حسنين ينظر إليه من فوق لتحت بكل قلاطة وعنطزة مكتفيا بالرد عليه بكلمة واحدة فقط: فاشية....