تامر فرج يكشف أسباب تفكيره في الاعتزال

عبر الفنان تامر فرج، عن استيائه من قلة المشاركة في الأعمال الفنية سواء الدراما أو السينما، وهو ما دفعه للتفكير في اعتزال الفن.

وقال « فرج» في تصريح خاص ل«فيتو»: «أنا ماقولتش أني بفكر في الاعتزال لقلة المشاركة في الأعمال الفنية، أنا بقول كده لعدم رضائي عن الطريقة الهوائية وغير الواضحة في اختيار الممثلين، وكذلك سوء الاختيارات التي انتقدها الجمهور كثيرا.
وأوضح أن الجمهور اشتكى أيضا من تشابه الموضوعات، وأحيانا ضحالة السيناريو وذلك بسبب تكرار نفس الكتاب.
وأضاف «فرج»، أن كل ذلك يهدر فرص الموهوبين، ويستفيد من الأعمال السينمائية مجموعة واحدة.
مسألة عدالة
وأكمل تامر فرج حديثه قائلا:" هي مسألة عدالة مش أكتر إنما أنا الحمدالله مؤمن إن اللي ربنا بيبعتهولي وبيكتبهولي هو المناسب ليا مش أكثر من ذلك فمش عايز أقول أني اتظلمت فنيا لكن هناك الظلم الواقع علي الجميع.
و اختتم تامر فرج قائلا:" واعتقد انى سوقت الأسباب كلها تقريبا فى البوست بتاعى وانا فى جميع الأحوال مش منتظر حد يتواصل معايا لأن الوسط كله عارف اللى انا بقوله دى مش حاجه جديده وعارف ان البوست مش هيغير حاجة إنما هو بالنسبة لى هو تسجيل موقف وتأكيد رفض ما يحدث حتى يفهم الناس كيف افكر ومن هو تامر فرج.
منشور تامر فرج
وكان الفنان تامر فرج قد كتب عبر "فيس بوك:" لبوست ده مش حالة اكتئاب ولا يأس ولا انهزامية خالص.. هو مجموعة أسئلة أرجو أنها توصل للقائمين على صناعة الدراما والسينما والفن في البلد وبره البلد، وحد يتكرم مشكورًا بالرد عليها.
وأضاف تامر فرج: الحمد لله الناس كلها بتقول لي أن أنا موهوب وعندي كاريزما، ومش عارف إيه وبيحيونى على أدائي وتمثيلي وشواهد كتير بتقول إني بعرف أمثل.. واللي يقهر السؤال اللي مش عارف ليه يتوجه لي أنا لما بيقولوا لي أنت ليه مقل في أعمالك؟؟ ده إحنا بننتظر مشاهدك وشغلك.. أو أنت ليه ما بتعملش سينما؟.. أو أنت إزاى مابتاخدش مساحات أكبر من كده؟.. زي ما يكون أنا اللي مابشتغلش بمزاجي.. والأسئلة اللي بطرحها للمنتجين والمخرجين.
وتابع: أنا اسمى تامر فرج ممثل وسيناريست.. هل ممكن أمثل أو أكتب عشان أنا موهوب فقط مش عشان عندي عدد فولورز كتير على السوشيال ميديا؟.. هل ممكن أمثل أو اكتب بموهبتي وأنا راجل مابحبش أتنطط في خروجات وكافيهات وسهرات وتجمعات وبفضل إني اقعد فى بيتي مع أسرتي اكتب واشتغل على نفسى في التمثيل؟.. هل ممكن أمثل أو اكتب بموهبتى من غير ما اتلزق فى مهرجانات وحفلات لأنى مابحبش اروح أي حدث فنى غير لما أكون معزوم بجد ومرغوب فى وجودى ؟؟؟.. هل ممكن أمثل أو اكتب بموهبتي من غير ما اقعد استعض نفسى وصوري على الانستجرام واكتب صباح الخير وجمعة مباركة وإيه رأيكم فى اللوك الجديد أو أفضل أسوق نفسى بصوري فى الجيم وأنا اتصبب عرقا وأفرز عضلات من كل حته فى جسمي؟.
واختتم بقوله: الحل الوحيد للتواجد عشان المنتجين والمخرجين يفتكروني، لكن أنا للأسف ماتربيتش كده واتربيت على احترام أهل بيتى وإنى اشتغل بموهبتى مش بتواجدى وخلاص، ويوم ما هستخدم السوشيال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشيال ميديا؟.. هل ممكن أمثل أو أكتب بموهبتي مش عشان أنا من شلة فلان أو صاحب فلان؟؟؟ مع العلم أن الوسط كله أصحابي لكن أنا مبعرفش أفضل أبعت للمخرج فلان والمنتج علان تحياتي وسلاماتي وبوستات عيدكم مبارك وصباح الرضا، ومع العلم أن أخويا المخرج العبقري أستاذ وائل فرج، ومع ذلك ما بيقدرش يجيبني في أعماله أحيانا لأن جهة الإنتاج مش موافقة!..مش عايز ردود تعاطف، واللي عايز فعلا يساعدني يساعد أن البوست ده يوصل أو يمنشن حد من الوسط يكون عنده إجابات.. ولا نعتزل ونشوف حاجة تانية؟.