حسام حبيب يتحدث لأول مرة عن أزمة شيرين: طلقتها بسبب إدمانها.. أغمي عليا لما حلقت شعرها.. لما اتصلحنا عشنا مع بعض من غير ورق.. وهذا ما يحاك لها

دافع الفنان حسام حبيب عن نفسِه ضد الاتهامات التى وُجهت له خلال الفترة الماضية في أزمة زوجته الفنانة شيرين عبد الوهاب، مؤكدًا أن التفسيرات التي أُثيرت خلال الفترة الماضية عن طبيعة علاقته بشيرين لم تكن صحيحة وبها مغالطات كثيرة.
وفي البداية أكد الفنان حسام حبيب أن "الفنانة شيرين عبد الوهاب بعد أن دخلت مستشفى الصحة النفسية حاولت الانتحار مرة، ودا طبقًا لأحد العاملين بداخل المستشفى".
وأضاف خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "الشخص اللي في مستشفى شيرين عبد الوهاب قال لي حالتها صعبة بقالها 4 أيام، وحاولت الانتحار".

حالة شيرين عبد الوهاب
وتابع: "اللي عرفته إن شيرين قعدت 4 أيام من غير أكل، وما أكلتش إلا في اليوم الخامس، وظهر عليها علامات ضرب على جسمها، وشعرها متقطع".
قال الفنان حسام حبيب: "أنا مش معترض على الغاية المتعلقة بعلاج شيرين عبد الوهاب من الإدمان، ولكن الوسيلة المستخدمة من سحلها وضربها وفتح عليها مطواة وإجبارها على الخروج من منزلها بالبيجامة ووضعها بطريقة مهينة في السيارة للمستشفى أمر صعب ولا يمكن قبوله".

علاج شيرين من إدمان المخدرات
وأكد خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "حصل إن شيرين عبد الوهاب كانت مدمنة مخدرات وقت زواجنا واتعالجت وبقت كويسة الحمد لله ولكن منهم لله اللي أخدوها لسكة تانية أوحش".
وأكد: "لم أحاول تهديد شيرين عبد الوهاب بالمسدس، أنا لديَّ مسدس مرخص وهي كانت بتخاف لما تشوفه معايا وتقول لي حطه في الخزنة، ولما انفصلنا أخدته من الخزنة وأنا ماشي فيمكن تكون فكرت إني كنت بهددها، ولكن والله العظيم ما حصلش إني هددتها".

حلق شعر شيرين عبد الوهاب
وأوضح "حسام": "بداية الخلاف مع شيرين من وقت حلق شعرها لأنها كانت بتضغط عليا من باب الانفصال علشان تريح أهلها غصب عنها، وهي طلعت وقالت والدتي سبب طلاقي من حسام حبيب".

استغاثة شيرين عبد الوهاب بحسام حبيب
وتابع: "العلاقة بيني وبين شيرين عبد الوهاب كانت علاقة صداقة وبعدين اتطورت لما كانت بتستنجد بيا علشان تخرج من محيطها الأسري علشان هي بتنهار وبتتقطع وبتتنهش، وقتها كرست حياتي كلها علشان أساعدها وأخلي شغلها يمشي بطريقة بروفيشنال".

سبب كراهية أسرة شيرين لحسام حبيب
وأكمل: "أنا وجودي كان غير مستحب لأسرتها لأن الحنفية اتقفلت بمعنى إن محدش هياخد من شيرين حق مش حقه، وإن شيرين عبد الوهاب لازم تأمن أرقام مالية لها في المستقبل، ووقت ما جيت أتجوز شيرين كانت فلوسي أكتر منها بكتير، وهي نجاحها ما كانش مترجم لأي حاجة ورقمها في البنك كان صادم ليَّ، وحسيت وقتها إنها منتهكة".
قال الفنان حسام حبيب: "أول لما اتجوزت شيرين عبد الوهاب اكتشفت أن الناس اللي عايشين من خيرها وبياكلوا ويشربوا من شغلها وكفاحها، عايزين يمتلكوها وبقيت أنا العدو الأول ليهم علشان بحاول أحافظ ليها على مكاسبها وفلوسها، واشتغلوا 4 سنين أن الشخص اللي هو أنا لازم يمشي وهما نجحوا في كده، وكبروا الشرخ اللي بيني وبين شيرين، وللأسف عيب شيرين أنها بتتأثر بالكلام فوق الوصف، وبعدين وصلنا إلى الطلاق".

حقيقة سحل وضرب شيرين
وأكد: "عمري في حياتي ما كنت عنيف مع أي ست فإزاي أكون عنيف مع شيرين عبد الوهاب، أنا راجل متعلم ومتربي، ومتربي يعني إيه ست وده اللي خلاني الفترة اللي فاتت ما تكلمش رغم هجومها عليَّ، ما ينفعش أهاجم ست لو عاشت معايا ليلة واحدة، وما حصلش إني ضربتها ولا جرجرتها من شعرها ولا سحلتها".

أموال شيرين عبد الوهاب
وتابع: "علاقتي بشيرين ما كانتش سامة بالعكس كانت نقية وعمري ما أخدت منها جنيه واحد لا من وراها ولا قدامها، وعملت لها سيستم علشان أحافظ على فلوسها، ولما كانت بتقولي إني ليَّ نسبة على شغلي معاها كنت برفض، لأني واجبي إني أكبر مراتي وأزود فلوسها".
وأكد: "لما اتجوزت شيرين اتصدمت من حسابها الضعيف في البنك، ووقتها كانت فلوسي وأصولي أكتر منها بكتير، فعرفت إنها مضحوك عليها واللي حواليها بيستغلوها وهي ما عندهاش أي فكرة بالحساب البنكي".
قال المطرب حسام حبيب: "اللي وصلني لقرار طلاق شيرين عبد الوهاب إني ما كنتش راضي عن أسلوب حياتها وعيشتها، ولقطة حلق شعرها كانت بتحاول تجبر نفسها وتجبرني إني أطلقها رغم حبها الشديد ليَّ ولكن بفعل ضغوط أهلها".

بكاء حسام حبيب
وتابع: "لما شوفت شيرين عبد الوهاب وهي حالقة شعرها انهرت من العياط واغمى عليَّ وقلت لها ليه عملتِ ليه، وفي نفس اليوم اتخانقنا واتطلقنا، لأني كنت شايف أن الموضوع واصل لحتة إني ما ينفعش أكمل معاها، وأنا لو بفكر في الفلوس كنت عملت لي أغنية كل شهر وبقيت أشهر من شيرين ولكن أنا من يوم ما اتجوزتها معملتش أغنية واحدة".
موقف حسام حبيب من إدمان شيرين للمخدرات
وتساءل "حسام": "هل يعقل إن شيرين عبد الوهاب من يوم بيان الصلح لحد لما حصلت أزمتها الأخيرة إني وصلتها لمرحلة الإدمان للدرجة الثالثة مثلما صرح شقيقها؟ ده احنا مكناش بنكلم بعض من وقت طلاقنا".
وأشار: "لما اتصالحنا رجعنا كأزواج بس محدش كان عارف غير أهلها وأهلي، والطلاق حصل بورق والزواج ما كانش على الورق".

حقيقة تنمر حسام حبيب على شيرين
ولفت: "مفيش ولا مرة قلت لشيرين أنتِ تخينة ولكن كنت اتكلمت مع واحدة صاحبتها إني بوظت شيرين علشان كان المفترض كنت قلت لها خلي بالك أنتِ بتتخني ولكن سكوتي ضرها، وكان مهم إني أقولها لازم تاخد بالها من جسمها وما يزيدش وزنها، وتخس وتاخد بالها من صحتها ونفسها، ولكن أسلوب حياتها كان كله غلط ودا اللي كان بيضايقني".
وقال "حبيب": "لما رجعت لشيرين عبد الوهاب بعد الصلح لقيت نفس مشاكلها متكررة وأسلوب حياتها الغلط مستمر لذلك كان هناك صعوبة في استمرار حياتنا مع بعض واتطلقنا بشكل غريب في اليوم اللي طلبت ليا فيه الشرطة لأني كنت معترضًا على أسلوب حياتها واختلاطها بناس مش كويسة ووصلوها للمرحلة اللى هي فيها الآن".

إدمان شيرين للمخدرات
وأضاف خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "سمعت أن أخوها بيقول أنها مدمنة من الدرجة التالتة بس أنا مكنتش في حياتها الفترة اللى فاتت، والفترة اللي رجعنا لبعض فيها كأصدقاء بعد بيان الصلح لا تتعدى الأسبوع، ودي مش فترة توصلها للإدمان من الدرجة التالتة، وهنا اسأل ليه أخوها مأخدهاش وعالجها من الإدمان قبل بيان الصلح".

موقف شيرين الأخير من حسام حبيب
ولفت: "قبل الأزمة الأخيرة شيرين ليها عندي معزة خاصة، وهي جابتني في البيت اللى فيه والدتها وقالت لأمها إننا اتصالحنا، وأنا مرتاحة وده الشخص اللى هيريحني، وقالت لي أن من شيم الأدب أردلك كرامتك قدام الناس، فقلت لها اللى هيرد ليا كرامتي إنك تثبتي أن علاقتنا ببعض مش علاقة مضرة".
سيارة شيرين وحسام حبيب
وتابع: "تنازلت عن عربيتي لشيرين، والعربية دي شيرين قالت دي جزء من عرض جيبتهولها، وقالت لي العربية دي أقل من حقي، ولما أخدت العربية دي وقت ما اتخانقنا، وهي كانت مسجلاها باسمي هدية منها ليا على تعبي وشغلي معاها".
واستطرد: "شيرين لو شيفاني وحش كانت قفلت صفحتي ولو ب100 عربية ولكن علشان الحب فضل مستمر كانت طول الوقت عايزة علاقتنا تفضل مستمرة ولو على سبيل الصداقة، وأنا رجَّعت العربية قبل بيان الصلح بكتير، وهي منزلتش البيان علشان العربية، وفيه حد من المحيطين بيها خد العربية ونهبها، وقتها كلمتني وقالت لي أنا بوعدك أني أقف في ضهرك وأخليك أحسن حد علشان أنت نضيف وأكتر حد وقف معايا، فقلت لها وضحي للناس إني مش بضرك".

أموال شيرين وسر طلاقها من حسام حبيب
وأكد: "لو أنا السبب في إدمانها المخدرات كنت بقيت زيها، أهلى يمتلكوا أكبر المستشفيات، وكلام ميدخلش العقل وغير منطقي، سبب خلافنا الرئيسي وطلاقنا كان إدمانها المخدرات، وشيرين ربنا يشفيها عندها لسان وأنا متوسم فيها أنها تقول الحقيقة المرة دي وأنها تقول مين اللي تسبب في إدمانها المخدرات، ولو ببص على مصلحتها كنت أسحبها وآخد فلوسها إنما مش أنا اللي دمرتها، اللي بيدمر شيرين اللي عايز يحجر عليها واللي قال لي أنه معاه توكيل عام رسمي منها وهيحجر عليها وهيسحب فلوسها كلها، وهذا الكلام يسأل فيه المحامي حسام لطفي، فقلت لها يا شيرين خلي بالك لازم تأمني مستقبلك ومستقبل بناتك وفلوسها كلها بره مصر ولبناته، واللي عايز يحجر عليها خطته هتفشل".