غراب البين يكتب: هذا هو السبب الحقيقي لارتفاع أسعار البيض

بعد عناء يوم طويل من اللف والدوران والمرازية فى خلق الله قررت أريح جتتى فوق فرع الشجرة أمام سوبر ماركت الواد "مسعود بسطرمة" بإحدى القرى.. وبينما كنت منكمشا بين أجنحتى وقبل أن أروح فى النوم سمعت صوت سيدة عجوز وهى تعترض على سعر كرتونة البيض وتقول بأعلى صوتها ليه يعنى الكرتونة ب 80 جنيه.. هو بيض أورجانيك ولا الفرخة باضت فى مستشفى خاصة بعملية قيصرية؟

مسعود بيزعق ويقول: وانا مالى يا ست الحاجة.. هو انا اللى ببيض يعنى؟.. طب ياريت كنت ببيض كان زمانى فقستلك نص كرتونة دلوقتى وأدتهالك ببلاش.. روحى اسألى أصحاب المزارع رفعوا سعرها ليه.. أنا مجرد بياع ومكسبى معروف للجميع.

وهنا وقفت على قدمى ونفشت ريشى وأخذت أنعق بأعلى صوتى "قاق قاق" فراحت السيدة ومعها مسعود وباقى زبائن السوبر ماركت يهشوننى ويقولون لى غور من هنا يا غراب البين الله يحرقك جبتلنا النكد والفقر.

فهربت مسرعا مرفرفا بأجنحتى قبل أن يحدفوننى بالطوب ولسان حالى يقول: بقا أنا اللى جبتلكم النكد والفقر يا شوية بنى آدمين أم أنكم من تنكدون على أنفسكم بأفعالكم وتخليكم عن أصولكم؟
أنا كغراب لو غضضت الطرف عن أباطرة الإحتكار الذين ظهروا على الساحة مؤخرا فسأرى أنه مفيش أى سبب تانى لإرتفاع أسعار البيض سوى أن السيدات فى الريف عزفوا عن تربية الفراخ فى المنازل.. وعشة الفراخ اللى كانت فى كل بيت ريفى أصبحت صالون للبنى آدمين.. والست اللى كانت بتبيع البيض المتبقى من استهلاك أهل بيتها أصبحت بتشتريه زيها زى ستات البندر.. حتى العيش اللى كانت بتخبزه بإديها أصبحت بتشتريه وتقف فى الطوابير من أجل الحصول عليه

لو البيض اللى كانت بتنتجه العشش بتاعتنا رجع تانى بالتأكيد سعر البيضة هيرجع زى زمان.. لكن قول للزمان ارجع يا زمان.. وجاتها ستين ألف نيلة اللى عايزة تخلف بنى آدمين زيكم تركوا الخبيز وتربية الفراخ وتفرغوا للتيك توك وفيديوهات الروتين اليومى وأصبحوا يعرفون معنى البيض الأورجانيك ويحترفون أكل البسطرمة!