نهاية دراماتيكية.. رحيل بن شرقي عن الزمالك.. ومرتضى للزملكاوية: جابها على بلاطة ومش هنبوس على إيده.. ومتجبوش مناخيرنا الأرض علشانه

وجَّه المستشار مرتضى منصور رئيس نادي الزمالك، رسالةً لجماهير القلعة البيضاء، قائلًا: "حرام عليكم حافظوا على كرامة ناديكم.. أنت عايز ناديك يبقى ذليل ويبوس إيد لاعب علشان يوقع، أنا مش هعمل كده".
انتهاء عقد بن شرقي
وتابع خلال فيديو له عبر قناة "يوتيوب": "بن شرقي كان المفترض يوقع قبل ما نيجي لأن عقده خلص يوم 31 ديسمبر زي فرجاني ساسي، وإحنا استلمنا 10 مارس الماضي، ومحدش يكلمني عن لجنة فاشلة موقعتش معاه أيامها، إحنا قعدنا معاه إمبارح، وقال مش عايز أقعد في مصر نبوس دماغه يعني".
رسالة لجماهير الزمالك
وأضاف: "بن شرقي لاعب محترم ومحترف وصريح وصادق وجابها على بلاطة، وقال عايز أروح قطر أو تركيا، هنعمل حفلة ونكرمه ونجيب بديل ولا نبوس الدماغ.. مش أنا اللي أبوس دماغ لاعب، يا بعض جماهير الزمالك متهينوش ناديكم ده نادي الكرامة والوطنية والكبرياء".

واجهة بن شرقي
وتابع: "بن شرقي رسمي وهو قاعد مع أمير مرتضى قال يا جماعة أنا بعشق الزمالك بس عايز أسافر أروح قطر أو تركيا".
ولفت: "بن شرقي لاعب مغربي محترف وأسعدنا نقوله متشكرين ولا نبوس الأيادي علشان يقعد أنا مببوسش إيد حد، فوقوا يا جماهير الزمالك النادي مش هيتحايل على حد، ياما لاعيبة جت وراحت والزمالك هو الزمالك تاريخ، اوعوا تنزلوا وتجيبوا مناخيرنا الأرض علشان لاعب".

حسم الأمر
واختتم رئيس نادي الزمالك، قائلا: "قعدنا جلسة أخيرة معاه وقلنا له عايزين نجدد معاك والناس عايزاك وهو رغبته يمشي ولا لف ولا دار ولا عايز أعمل صلاة استخارة ولا قدرني هو لاعب محترم محترف وحسم أمره، يا جماهير الزمالك متلووش دراع نادي الزمالك وتبهدلوا كرامته في الأرض".