حجاجوفيتش: 5 أشياء تشغل فكر المصريين قبل السفر لروسيا

غرفة السياحة: النظام الإلكتروني أسهل طريقة لحضور مونديال روسيا
قال الرحالة المصري أحمد حجاجوفيتش، إن عدد المصريين الذين سيسافرون إلى روسيا سيكون غير مسبوق، مشيرًا إلى أن عدد الرسائل الكثيرة التي وصلته من المصريين الذين يسألون عن كيفية الحصول على فيزا سياحية لروسيا.
وأكد حجاجوفيتش أن المصريين الذين يرغبون في السفر لروسيا لحضور كأس العالم 2018 لن يغادروها، ولكنهم يرغبون للعيش والزواج من روسيات، مشيرًا إلى أن المصريين بدءوا تعلم اللغة الروسية وأكثر الكلمات بحثًا على جوجل أصبحت "بحب روسيا وبحبك وأنت جميلة".
وكتب أحمد حجاجوفيتش تدوينة على "فيس بوك" قال فيها: "من اللحظة اللي مصر تأهلت فيها لكأس العالم اللي سيقام في روسيا 2018 وجالنا على الصفحة عدد رهيب من الرسائل وكلها كانت لنفس السؤال: إزاي أقدر آخد فيزا سياحية لروسيا في كأس العالم وبعدين أكسرها وأتعرف على واحدة وأعيش هناك".
وأكد أن هناك 5 أشياء بدأ يقوم بها المصريين: "مش بس كده... في 5 حاجات كل المصريين تقريبًا بدءوا يعملوها: 1- كله دخل على الإنترنت واليوتيوب يتعلم روسي بدون معلم وأكتر كلمات إتعمل بحث عنها "بحبك- إنت جميلة أوي- من زمان بحب روسيا- روحتي شرم الشيخ قبل كدة؟".
وقال: "2- كله حيدوس على نفسه الشهور الجايين عشان يحوش شوية فلوس ويستلف شوية فلوس من كل اللي يعرفهم عشان يحطهم في حساب بنك ويقدمه للسفارة وهو بيقدم على الفيزا... لأن يا روح ما بعدك روح".
وأضاف: "3- عدد المشجعين المصريين اللي حيسافروا روسيا حيبقي رقم تاريخي عالمي أكتر من عدد اللاجئين اللي هربوا من الحروب على أوروبا في الخمس سنين اللي فاتوا، والمشجعين المصريين هما الوحيدين اللي لو فتشوا شنطهم في المطارات في روسيا حيلاقوا معاهم لبس شتوي تقيل مع إن كأس العالم حيكون في الصيف (وده طبعًا لزوم العيشة في الشتا، لأن اللي حيروح مش حيرجع).
وعلق: "4- الشرطة الروسي حتبقى قدام إختبار صعب جدًا في إنها تتمكن من الإمساك بملايين المصريين اللي حيغزوا بلدها وحيضربوا على الفيزا وده آخر مرة حصل في روسيا كان أيام الحرب العالمية".
وتابع: "5- خلينا نبص على الإيجابيات ونص الكوباية المليان وإن المصريين حيقضوا على العنوسة في روسيا والجيل الروسي الجديد حيطلع حلو وأسمر ومسمسم زي أباهاتهم المصريين ورئيس روسيا بعد 40- 50 سنة حيبقى مخلط "أبوه من المنوفية وأمه من موسكو" لكِ الله يا روسيا".