سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
النشطاء يبدأون 2013 بهاشتاج "حاجة عايزها تحصل".. سها: الناس تتكلم دون تزويق.. محمد: يبقوا العاقلين فى البلد أكتر.. سلمى: مصر تبقى أحلى ونخلص من الإخوان ..كامورا: حق الشهداء يرجع ونتأهل لكأس العالم
بدأ النشطاء على تويتر بتدشين هاشتاج جديد لاستقبال عام 2013 بعنوان "حاجة عايزها تحصل" ودون النشطاء أمنياتهم ورغباتهم التى يتمنونها لأنفسهم ولمصر، وجذب الهاشتاج المئات من النشطاء. سها على "حاجة عايزها تحصل أن الناس تطلع اللى جواها من غير تزويق فى الكلام" شهندا شاهين تمنت "حاجة عايزها تحصل مصر ترجع بخير واللى بيفسدوا فيها ما يشوفوا ولا يوم خير!" محمد إسماعيل قال: "حاجة عايزها تحصل يبقوا العاقلين فى البلد دى أكتر من الجهلة". وتمنت نيرمين محمد "حاجة عايزها تحصل إن مايبقاش في أطفال شوارع ولا ناس كبيرة في السن متبهدلة في الشارع مش لاقية تاكل ولا في حد يسأل عليها". وتمنت نوال سلطان "حاجة عايزها تحصل الأهالى يسهلوا متطلبات الزواج ولا يغالوا فى طلباتهم". خالد صبري كامورا تمنى" حاجة عايزها تحصل حق الشهداء يرجع، الدوري يرجع، نتأهل كأس العالم". هند فاروق قالت "حاجة عايزها تحصل الاقتصاد المصرى يرجع أقوى مما كان وترجع قيمة الجنيه المصرى ويرتفع دخل المواطن لمستويات إنسانية". أحمد شريف قال "حاجة عايزها تحصل أن المتعلمين والمثقفين مش عشان هما سلفيون يقتنعوا بأي حاجة بيقولها شيوخ السلف حتى لو فيها سب أو تكفير للناس". إيمي سمير قالت: "حاجة عايزها تحصل ما تكتشفش بعد 4 سنين إن أصحابك طلعوا ناس تانية غير اللى كنت عارفهم". مريم مصطفي قالت: "حاجة عايزها تحصل يتم تنظيف الشوارع من أكوام الزبالة وكل واحد يبتدي بنفسه وميرميش ولو ورقة صغيرة في الشارع". فاطمة والي قالت: "حاجة عايزها تحصل شبابنا لما يتخرج يلاقي شغل وميقعدوش على القهاوي". أحمد رجب قال: "حاجة عايزها تحصل إن المعارضة تبدأ تاخد خطوات حقيقية على الساحة السياسية وتعرف إن كلنا معاها". مريم سميح تمنت: "حاجة عايزها تحصل إن ميبقاش في ناس بدور على أكلهم في الزبالة". زهراء محمد قالت: "حاجة عايزها تحصل كل إنسان يكون ليه حق العلاج فى مستشفيات نظيفة ورعاية زى اللى معاهم فلوس بالظبط". حسام حمدي قال: "حاجة عايزها تحصل.. يبقى الإعلام عندنا إعلام ناقل للحقيقة .. مش مطبلاتى". جوزيف إبراهيم قال: "حاجة عايزها تحصل كل واحد فى الشارع يخليه فى نفسه ويبطل يركز فى لبس دى وشكل ده ومين ماشى مع مين". محمد عبد الرازق قال: "حاجة عايزها تحصل إني الاقي الشوارع فاضية وأبقى مستمتع وأنا ماشي على رجلي أو بالعربية". محمد أبو أشرف قال: "حاجة عايزها تحصل نفسى كل واحد يبدأ بنفسه وميقلش مش أنا لوحدى اللى بعمل كده هى جت عليا". سلمي قالت: "حاجة عايزها تحصل أشوف كل اللي بحبهم مبسوطين وإن مصر دي تبقى أحلى دولة ونخلص من الإخوان بقى.. حاجات عبيطة ومش مترتبة أنا عارفة". محمود عصام: "حاجة عايزها تحصل إن المصريين كلهم يتجمعوا فى حلم قومى كبير.. زى السد العالى .. أيام زمان".