الإخوان وبوجي وطمطم

كنت حتى وقت قريب استغرب على حال النصاب وأتساءل دائمًا كيف يستطيع أن يضحك على الناس ويقنعهم بصدقة ويوقعهم في "الفخ" بس لما ركزت شويتين وبصيت على مشوارنا مع الخديعة والنصب لاقيت إننا أكتر شعب ممكن ينضحك عليه بسهولة جداً من أي حد وفي كل وقت حتى لو كانت ضحكة تافهة وضعيفة ، فمثلاً مع احترامي للسيدة الجميلة هالة فاخر والراحل يونس شلبي اللي امتعوا الناس بمسلسل بوجي وطمطم، إلا أنهم قدروا يقنعونا بأن بوجي صديق طمطم، وأن بينهم حب وعشرة بالرغم من أن بوجي قرد وطمطم أرنب، لكن تقول إيه بقا دخلت علينا وكلنا شربنا المقلب واستمتعنا بحكايتهم ومواقفهم، وكنا بنعتبر المسلسل حاجة خرافية وعلامة من علامات الفن المصري، وللأسف متعلمناش من الدرس لحد لما جه الفنان محمد هنيدي وضحكنا كتير في فيلم " عسكر في المعسكر " ، واقنعنا أنه بيخدم الجيش في سلاح الامن المركزي بالرغم انه ملوش أخوات وملوش إنه يدخل الجيش من الاساسن بس برضو تقول إيه إحنا شعب طيب أكتر من اللازم وبرضو دخلت علينا وشربناها لحد , لما كنت بأقول الموضوع ده لأي صديق ليا يروح واقف ومتنح ويقولي " ااااااه صحيح ازاي دخلت عليا الحكاية دي ؟!!
المهم مش عايز أطول عليكم انا عايز أقولك بس إنكم متستغربوش لما تلاقوا ناس حوليكم لسة بيناصروا الإخوان وبيسبحوا بحمد قاداتها بيعتبروهم أنصاف آلهة تمشي على الأرض بالرغم من الحماقات اللي بيرتكبوها كل لحظة في حق الوطن . فأكيد اللي دخلت عليه خدعة بوجي وطمطم اللي مكشوفة قوي من السهل ان تدخل عليه خدعة الإخوان اللي طبعاً هم أساتذة في الخديعة ولبس توب العفة والدين والالتزام .
الموضوع ببساطة أن في ناس كتير لسة عايشة خدعة الإخوان بس ياولداه مش عارفة إن الفرق الوحيد بين خدعتهم وخدعة بوجي وطمطم أن بوجي مسلسل وراح لحاله لكن الإخوان فصيل بيحكم مصر وده معناه ياحلو انك بتسلم عيالك ومالك لناس حريفة نصب، هتقبل ده ؟