هريدى نيوز

صنافير رجعت كاملة لينا ومصر اليوم في عيد
علمت وكالة «هريدى نيوز» أن الفنانة المعتزلة شادية قررت العودة للغناء بتوزيع جديد لأغنية سينا رجعت كاملة لينا، وولاد الحلال دلوها على حميد الشاعرى باعتباره أكتر واحد شقلب التراث الغنائي، احتفالا منها بعودة تيران وصنافير بحكم محكمة.
صرح بذلك مصدر فشار غاوى تنكيت وهزار، وأضاف أن صنافير رجعت كاملة لينا أغنية مزعلة بعض المصريين أكتر من إخواننا السعوديين وإن بعضهم حلف بالطلاق إن شادية مش هتغنى تانى وهيرفع نقض بكدا ومعاه الدليل والإثباتات إن صوتها لم يكن مصريا وهى اللى زرعت الشوك.
يا خارجة من الاتحاد الأوروبي وكل خد عليه خوخة
علمت وكالة «هريدى نيوز» أن المستشارة الألمانية أنجيلا ميركل اتصلت برئيس الوزراء البريطانى ديفيد كاميرون وظلت تواسيه طول الليل وتقول له: متشلش في نفسك خالص وأكيد «الخوارج» دول مش هيشوفوا يوم عدل ودى بداية الربيع الأوروبي.
صرح بذلك مصدر فشار غاوى تنكيت وهزار وأضاف أن كاميرون ارتفعت روحه المعنوية بعد هذا الاتصال وراح يغنى «يا خارجة من باب الاتحاد وكل خد عليه خوخة» فضحكت ميركل وانكسفت وقالت له يا راجل عيب عليك في السن دا يطلع منك كل دا!