النشطاء يحددون أجمل ما في مصر.. بودي: ربنا خلقها حلوة.. أحمد: روايح شهر الصيام اللي صعب تلاقيها في بلد تانية.. مازن: الفوانيس والزينة ولمة العيلة والمسحراتي وصلاة التراويح.. بركات: الأم المصرية الجدعة

دشن نشطاء مواقع التواصل الاجتماعي "فيس بوك وتويتر" هاشتاج "فيها حاجة حلوة"، الذي احتل مركزا متقدما على تراند مصر، النشطاء أكدوا أن رمضان في مصر، و"لمة العيلة" وطيبة قلب المصريين، من أجمل ما في مصر.
قلوب طيبة
قالت فاطمة: "فيها حاجة حلوة.. قلوب طيبة جميلة بسرعة تتآلف".
وأضاف بودي عمر: "مصر حلوة علشان ربنا خلقها حلوة مش ذنبها الفساد والفقر وكل اللي بيحصل ده.. ده ذنب بشر مش ذنبها.. بحبك يا بلدي.. فيها حاجة حلوة".
وعلق محمد أحمد: "النخوة.. فيها حاجة حلوة".
وردت ياسمين سعيد: "فيها حاجة حلوة.. جاتوه بالكريمة وآيس كريم بالفانلية ودنش من عند العبد وشيش من عند جاد وميلك تشيك من ماك وفتة شاورما من مصعب وريزو من kfc".
وتابع محمد توفيق: "الأهلي.. فيها حاجة حلوة".
شعب غلبان
وقالت لولي هاني: "مافيش أحلى من بلدي.. فيها حاجة حلوة.. مصر ليست دولة تاريخية؛ مصر جاءت أولًا ثم جاء التاريخ".
وأضاف بياع بطاطا: "فيها حاجة حلوة كلها حلوة إلا الإزالة (البلدية) منهم لله.. فيها حاجات حلوة كتير فيها ناس جميلة قوي قوي فيها شعب طيب وغلبان وخامة نظيفة ومش ملوثة فكك من الجعجعة والفلحسة.. من جوه حلوين".
وعلق إيجي الدولار المصري: "لاء البلد دي فيها حاجة حلوة وهتفضل طول عمرها حلوة".
وتابع محمد شرقاوي: "فيها حاجة حلوة حاجة واحدة بس.. كلها حاجات حلوة كتيييير".
ورد أحمد السبيعي: "وأحلي ما فيها روايح شهر الصيام اللي صعب تلاقيها في أي بلد تانية.. اللهم بلغنا رمضان.. فيها حاجة حلوة".
رمضان
وقال ميدو الصمتي: "فيها حاجة حلوة.. عم عبدو بتاع الكبدة".
وأضاف تامر إبراهيم: "فيها حاجة حلوة الوشوش والقلوب الطيبة".
وعلق مازن محمد: "الفوانيس والزينة ولمة العيلة والمسحراتي وصلاة التراويح".
ورد محمد: "فيها حاجة حلوة شعبها شعب عظيم بس مش حاسس بقيمته الحقيقية- مصر".
وتابع محمد عز: "طيبة وبساطة أهلها مستحيل تلاقيها في مكان في العالم.. فيها حاجة حلوة".
الأم الجدعة
وقال محسن بركات: "فيها حاجة حلوة.. الأم المصرية الجدعة".
وأضافت مني: "فيها حاجة حلوة تجلى الله عز وجل على أرضها..لازم يكون فيها حاجات حلوة".
وعلقت مها عيسى: "فيها حاجة حلوة أما أتوه في شارع وأسأل ألاقي شبابها يقولوا لي يا أستاذة وشيبانها يا بنتي والصعايدة إيه يا أبويا وهم ولا حد فيهم يعرفني".
ورد طارق عبد الرازق: "فيها حاجة حلوة.. قعدة صحابي على قهوة بلدي ولمة العيلة".
وتابع مراد السلحدار: "تأييلة العصرية في مصر واللمة على الطبلية.. باختصار مصر.. فيها حاجة حلوة".