لحظة التأبين

فِ قلب مغارة مهجورة
بتسمع همس سنيورة
وطاقة نور فِ بنورة
تقول مصباح علاء الدين
وتجرى عليها بالمشوار
تشوف الليل مخاوى نهار
وتطرح شجرة الصبار
بدال الشوك فراولة وتين
حقيقة كانت ولا سراب
قرايب صبحوا ك الأغراب
مفيش إقفال على الابواب
تعيش ميت مع العايشين
وكام متعوس فِ موود ساخر
ونوع ويسكى من الفاخر
ودنيا دنيّة ع الآخر
وأصل الإنس هو الطين
سمانا ليه ماهيش طاهرة
لجام سجّان فِ إيد مُهرة
ثكالى يموتوا م القَهرة
بكارة أمة صُنع الصين
ونسمع رعد صوت خوفنا
نقوم ندّارى فِ كسوفنا
نخبي همومنا فِ كفوفنا
وتبدأ لحظة التأبين!!