فيديو| أديب: «عندنا محلات مخصصة للبيض».. ورانيا بدوي تنفجر ضحكًا

علق الإعلامي عمرو أديب، اليوم الثلاثاء، على عدم تعامد أشعة الشمس على تمثال الملك رمسيس الثانى بمعبده بأبو سمبل هذا العام، قائلًا بسخرية: «وزير الآثار هو السبب، نبر فيها، حسد تعامد الشمس وقالك الفراعنة مش بيفهموا حاجة، اتبطر على النعمة وقال الموضوع صدفة، فربنا حب يقوله طيب مفيش شمس تاني على وجه رمسيس».
أكمل «أديب» سخريته، خلال تقديمه برنامج «القاهرة اليوم»، عبر قناة «اليوم»، «حتى الشمس اللي كانت بتتعامد على وجه الأستاذ رمسيس لم تعد تتعامد، وبعد ده كله عايزين تسيبوا وزير السياحة، ما هو لو عامل شغله كويس كانت الشمس تعامدت، 2400 سائح مستنيين الشمس تنزل على وش رمسيس قامت نازلة على صدره، حتى الشمس مش عارفين تنزلوها على وش الراجل؟ فضيحتنا بقت بجلاجل».
انتابت الإعلامية رانيا بدوي، نوبة حادة من الضحك، قائلًة: «خلاص حقك عليه أنا، أنا غلطانلك، وبعتذرلك إنت ورمسيس، وبعدين هما كانوا هيعملوا إيه يعني؟ يروحوا يزقوا التمثال عشان تنزل الشمس على وشه؟ يا عم السحب اللي حجبتها، إنت مش عاجبك حاجة خالص، لا تمثال رمسيس، ولا البيضة بتاعت المنيا اللي منقوش عليها لفظ الجلالة».
علق «أديب»: «عرفت إنهم جابوا للبيضة صندوق وحريرة لونها أصفر عشان يحتفظوا بيها»، ردت «رانيا»: «هما مش لازم يحطوها في الثلاجة.. هي مش هتبوظ؟»، فأجابها: «بتمشّشّ بعد كده.. على فكرة دايمًا كل ما بيحصل حكاية البيض دي، بقعد أسأل نفسي إزاي مصر هي الدولة الوحيدة في العالم اللي عندها محلات للبيض، في مصر محلات بيض، محل كامل للبيض، مخصص للبيض فقط»، وانفجرت «رانيا» في الضحك، فقال «أديب»: «مالك.. بتضحكي ليه؟»، فأجابت: «نخرج فاصل يا جماعة».